Նոյեմբերի սկզբներին Հնդկաստանի Չեննայ քաղաքում մեկնարկելու է շախմատի աշխարհի գահի համար մրցամարտը գործող չեմպիոն, հնդիկ Վիշվանաթան Անանդի եւ հավակնորդ, նորվեգացի Մագնուս Կարլսենի միջեւ:
ՖԻԴԵ-ի որոշմամբ մրցամարտի գլխավոր մրցավար նշանակվել է հայաստանցի միջազգային կարգի մրցավար Աշոտ Վարդապետյանը, որն իր դժվարին պարտականությունները կատարելու համար մրցավայր մեկնելու է նոյեմբերի 5-ին:
Aravot.am-ի հետ զրույցում Աշոտ Վարդապետյանը տեղեկացրեց, որ մրցամարտը նախնական որոշված ժամկետից երկու օր հետաձգվել է եւ կմեկնարկի նոյեմբերի 9-ին: «Չեննայ կժամանեմ նոյեմբերի 6-ին: Հաջորդ օրն առավոտյան կլինի տեխնիկական հանդիպում մրցամարտի մասնակիցների եւ նրանց ներկայացուցիչների հետ, որի ժամանակ վերջնական պայմանավորվածություններ ձեռք կբերվեն: Այնուհետեւ, կլինի վերջին այցելությունը «Հայաթ Պալաս» հյուրանոց, որտեղ կայանալու է մրցամարտը: Երեկոյան կկատարվի բացման արարողությունը եւ վիճակահանությունը, որի ժամանակ կորոշվի, թե առաջին պարտիայում ով որ գույնով է խաղալու: Իսկ նոյեմբերի 9-ին ժամացույցը գործի կդրվի», – ասաց գլխավոր մրցավայրը:
Աշոտ ՀԱԿՈԲՅԱՆ
