«Մեր երկու երկրներն ունեն հիանալի քաղաքական կապեր»,-այսօր լրագրողների հետ հանդիպմանը հայտարարեց ՀՀ-ում Հնդկաստանի Հանրապետության արտակարգ և լիազոր դեսպան Սուրեշ Բաբուն: Նա հավաստիացրեց, որ երկու երկրները փորձելու են պահպանել հարաբերությունների այն թափը, որ կա:
Դեսպանը շեշտեց. «Այս տարի հիմնական շեշտը դնելու ենք տնտեսական և առևտրային հարաբերությունների վրա, քանի որ մեր երկկողմ հարաբերությունների մեջ սա ամենաթույլ օղակն է»:
Դեսպանն անդրադարձավ նաև ինֆորմացիոն և հաղորդակցության տեխնոլոգիաների ոլորտում ՀՀ-ի և Հնդկաստանի համագործակցությանը: Այնուհետև նշեց, որ Հնդկաստանի կառավարության աջակցությամբ կահավորվել են Տավուշի մարզի 72 դպրոցներ և նախատեսվում է այդպիսի ծրագիր իրականացնել նաև Վայոց ձորի 50-ից ավելի դպրոցներում:
Սուրեշ Բաբուն տեղեկացրեց, որ զարգացնելու են հարաբերությունները նաև առողջապահական ոլորտում: Այնուհետև ասաց. «Վերջերս Հնդկաստանի բժշկական խորհրդի ներկայացուցիչներ են այցելել Բժշկական համալսարան և փոխանցել են այն տեսակետը, որ գոհ են այստեղ բժշկական կրթության որակից: Փետրվարին նախատեսվում է հնդկական պատվիրակության այց ՀՀ, քանի որ հայկական դեղարտադրողները շահագրգռված են հնդկական դեղերի ներմուծմամբ և այս ոլորտում ևս համագործակցությունը կաշխուժանա»:
Կարդացեք նաև
Այնուհետև դեսպանն անդրադարձ կատարեց Հնդկաստանի ձեռքբերումներին ու նշեց, որ Հնդկաստանի ՀՆԱ-ի 6 տոկոս աճ ունեն, Հնդկաստանի տնտեսությունը տրիլիոնավոր դոլարներ է կազմում, այս տարի արբանյակ են ուղարկել Մարս:
Aravot.am-ի հարցին՝ հայ-հնդկական հարաբերութունների ընթացքը կփոխվի՞ ՀՀ-ի Մաքսային միությանն անդամակցելու պարագայում, պարոն դեսպանը նախ հարցը «պրովոկացիոն» որակեց ու պատասխանեց. «Հայաստանի՝ Մաքսային միությանը միանալը ինքնիշխան որոշում է և արվել է երկրի շահերին համապատասխան»:
Տաթև ՀԱՐՈՒԹՅՈՒՆՅԱՆ
