Ըստ ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանի՝ ամեն անգամ, երբ շփման գծում զինադադարը խախտվում է Ադրբեջանի կողմից, պատերազմի հավանականությունը մեծանում է. «Ես վստահ չեմ, որ Ադրբեջանը պատերազմ է ուզում, որ դա իրեն պետք է, բայց որ այդ խախտումները կարող են բերել պատերազմի վերսկսման՝ դրա հավականությունը կա, եւ մենք դրան միշտ պատրաստ ենք»:
Այսօր «Փաստարկ» ակումբում կայացած ասուլիսում Կիրո Մանոյանը անդրադարձավ նաեւ վերջին օրերին մեծ աղմուկ բարձրացրած դեպքին՝ թուրք ազգայնական Հասան Օքթայի այցելությանը Հայաստան եւ ՀՀ վարչապետի ու Ամենայն Հայոց կաթողիկոսի հետ լուսանկարներին: Պարոն Մանոյանն ասաց, որ լուրջ չի ընդունում այդ մարդու Հայաստան այցելությունը ինչպես այս դեպքում, այնպես էլ՝ մինչ այդ:
Նա չի կիսում նաեւ այն մտահոգություններն ու աղմուկը, որ առաջացավ այդ այցից հետո մեր հասարակության մեջ, մասնավորապես, մեղադրանքներն՝ ուղղված Ազգային անվտանգության ծառայությանը, թե տեղյակ չէր այդ այցից: «Իսկ ո՞վ գիտի՝ տեղյակ էին, թե տեղյակ չէին ԱԱԾ-ում, ո՞վ գիտի՝ հետեւում էին, թե չէին հետեւում»,-հարցնում է պարոն Մանոյանը:
Ինչ վերաբերում է լուսանկարներին, ապա նա հիշեց, որ երկու տարի առաջ էլ ինքն էր գնացել Անի, որտեղ եռագույնն էր բարձրացրել եւ լուսանկարվել: «Ինչպես իմ գնալը եւ դրոշ պարզելը չէր նշանակում, որ Հայաստանը ինչ-որ քայլ է անում, նույն ձեւով էլ այդ մարդու այցը չի նշանակում, որ Թուրքիան ինչ-որ հատուկ ծրագիր է իրականացնում: Ես այդքան լուրջ չէի ընդունի»- այսպես պատասխանեց նա հարցին, թե արդյոք այդ այցը եւ դրան հետեւած իրադարձությունները կապ ունեի՞ն Ցեղասպանության 100-ամյակին ընդառաջ Թուրքիայի ծրագրերի հետ:
Կարդացեք նաև
Մելանյա ԲԱՐՍԵՂՅԱՆ
