Հունիսի 12-ից հուլիսի 13-ը Բրազիլիայում անցկացվելիք ֆուտբոլի աշխարհի առաջնության մեկնարկից առաջ մարզական լրագրողների միջազգային ասոցիացիան (AIPS) ուղեցույց է հրապարակել, որում իր գործընկերներին, խորհուրդներ է տալիս, թե ինչպե՞ս պետք է իրենց պահեն Բրազիլիայում:
Ընթերցելով 15 կետից բաղկացած այդ ուղեցույցը՝ ակամա հարց է ծագում. արժի՞ մեկնել այդ երկիր ու լուսաբանել աշխարհի առաջնությունը:
Բրազիլիայում ողջ ու անվնաս մնալու կանոններն են.
Եթե ձեզ կողոպտում են, մի դիմադրեք: Առանց երկխոսության ու բանավեճի, տվեք բոլոր զարդերը: Մի հրավիրեք գողերի ուշադրությունը եւ աշխատեք զբոսանքի ժամանակ բջջային հեռախոսով չխոսել:
Երբեք ձայնարկիչով փողոցում մի զբոսնեք:
Կարդացեք նաև
Բանկոմատով գումար կանխիկացնելիս՝ եղեք շրջահայաց: Մի օգտվեք օդանավակայաններում գործող բանկոմատներից: Չարագործները սովորել են դրանք կեղծել:
Անձնագիրը ձեր մոտ մի պահեք: Դրա փոխարեն ունեցեք պատճենը:
Ձեր մոտ խոշոր գումար մի պահեք:
Գիշերային զբոսանքի ժամանակ շրջահայաց եղեք:
Ռեստորաններում շատ մի խմեք եւ բջջայիններն ու արժեքավոր մյուս իրերը սեղանին մի դրեք:
Աշխատեք գտնվել միայն գլխավոր փողոցներում:
Հատկապես օդանավակայանում եւ հյուրանոցում օգտվեք միայն պաշտոնապես գրանցված տաքսի ծառայություններից:
Հյուրանոցում եւ տրանսպորտում ուշադիր եղեք գրպանահատների նկատմամբ:
Գիշերը քաղաքում մի գտնվեք: Քայլեք միայն ձեր իմացած փողոցներով եւ խուսափեք հայտնվել անծանոթ թաղամասերում:
Զգույշ եղեք հանրամատչելի Wi-Fi ծառայություններից օգտվելիս: Բրազիլիան օնլայն խարդախություններով աշխարհում զբաղեցնում է 2-րդ տեղը:
Տաքսու ետեւի նստարանին մի օգտագործեք նոութբուք, I Pad եւ iPhone: Կողոպտիչները կարող են դրանք տանել, քանի դեռ տաքսին կանգնած է խցանման մեջ:
Իրերը առանց հսկողության մի թողեք անգամ ստադիոնների մամուլի կենտրոններում: Չարագործները սովորել են կեղծել հավատարմագրերը եւ կարող են այնտեղ գտնվել մրցման ընթացքում:
ԱՇՈՏ ՀԱԿՈԲՅԱՆ
Լուսանկարը՝ AIPS-ի
«Առավոտ» օրաթերթ
05.06.2014