Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Սիմիզար Հովսեփյանին բացարկ էր հայտնել ԱՄՆ-ում Հայաստանի դեսպան Տիգրան Սարգսյանի աղջկա՝ Նարինե Սարգսյանի եւ նրա խնամու՝ Հրանտ Սուվարյանի գործով պատասխանողների ներկայացուցիչ Յու.Խաչատրյանը:
«Առավոտը» ներգրավված է որպես երրորդ անձ:
Բացարկից առաջ կողմը միջնորդել էր դատարանին կասեցնել սույն գործի քննությունը, պատճառաբանելով, թե գոյություն ունի վարչական գործ եւ վարչական դատարանում էլ պետք է անցկացնեին շինարարական փորձաքննություն, պարզելու, թե վիճելի ավտոտնակն ում էր պատկանում, մինչեւ քաղաքապետի որոշումը, որի մասին տեղեկացրել էր նաեւ մեր լրատվամիջոցը:
Դատարանը մերժել էր:
Կարդացեք նաև
«Դատարանը նպատակ է հետապնդում սույն որոշումներով, քանի դեռ վարչական գործով անվավեր չի ճանաչված քաղաքապետի որոշումը, արագ ավարտել սույն քաղաքացիական գործը, պատճառաբանելով, թե հայցվոր կողմը օրինական ուժ ստացած փաստաթղթի հիման վրա է ճանաչվել պատասխանողին պատկանող գույքի համասեփականատեր , այսինքն, տիրացել է գույքին, ոչ թե անօրինական , այլ՝ օրինական կարգով»:
Պատասխանողի ներկայացուցիչը նաեւ նշել էր, որ դատարանը պարտավոր էր զերծ մնալ խոսքով կամ կողմնակալություն ցուցաբերելուց, ինչպես նաեւ նման տպավորություն ստեղծելուց:
Ըստ բացարկ հայտնող կողմի, դատավորն իր խոսքով, իր որոշումներով կողմնակալություն է ցուցաբերում ի վնաս պատասխանող կողմի եւ իր պարտականություններն իրականացնելիս անկողմնակալ չէ:
Դատարանը մերժել էր ինքնաբացարկի միջնորդությունը, հղում կատարելով քաղաքացիական դատավարության օրենսգրքով սահմանված հիմքերին.
«Գտնում եմ, որ պատասխանողի ներկայացուցիչ Յու.Խաչատրյանի պնդումները դատավորի կողմնակալության եւ անաչառության վերաբերյալ փաստեր չեն պարունակում, եւ չեն կարող վկայել դատավորի կողմնակալության եւ անաչառության մասին» :
Ռուզան ՄԻՆԱՍՅԱՆ
Լուսանկարը՝ Տիգրան Սարգսյանի ֆեյսբուքյան էջից
