Հայերենը` որպես քարոզարշավի լեզու: Թուրքական ընտրությունների պատմության մեջ առաջին անգամ թեկնածուներից մեկը չի խուսափում երկրի ազգությամբ հայ ընտրողների քվեները ստանալու համար նրանց հետ հայերեն խոսել, ավելի ճիշտ՝ երգել:
Օգոստոսի 10-ի նախագահական ընտրություններից մի քանի օր առաջ քրդամետ Ժողովրդա-դեմոկրատական կուսակցության թեկնածու Սելահետտին Դեմիրթաշի շտաբը նոր նախընտրական երգ թողարկեց միանգամից երեք լեզուներով` թուրքերեն, քրդերեն և հայերեն:
Եռալեզու քարոզչությունը, սակայն, Դեմիրթաշին առայժմ չի օգնում: Վերջին սոցհարցումների համաձայն՝ Ժողովրդա-դեմոկրատական կուսակցության ղեկավարը առաջադրված երեք թեկնածուների թվում իր վարկանիշով վերջինն է: Հուլիսի 29-ին Konda հետազոտական կենտրոնի հրապարակած հարցման արդյունքների համաձայն՝ Դեմիրթաշը կարող է հավակնել քվեների 7․5 տոկոսին: Sonar կենտրոնի պատվերով անցկացված հարցման համաձայն էլ՝ Դեմիրթաշի վարկանիշը մոտ 8 տոկոս է:
Նույն հարցումների համաձայն, ընտրարշավի միանձնյա առաջատարը իշխող «Արդարություն և զարգացում» կուսակցության թեկնածուն է` գործող վարչապետ Ռեջեփ Էրդողանը: Արդեն հիշատակված հետազոտությունների համաձայն՝ Էրդողանի վարկանիշը 53-55 տոկոսի միջակայքում է, ինչը նշանակում է, որ Թուրքիայի վարչապետը կարող է հաջողության հասնել արդեն առաջին փուլում:
Կարդացեք նաև
Նյութն ամբողջությամբ՝ սկզբնաղբյուր կայքում
