Օֆշորի գործով կալանավորված Աշոտ Սուքիասյանի հարցաքննությունը դեռ չի ավարտվել: Տուժող գործարար Փայլակ Հայրապետյանի փաստաբան Վաղարշակ Գեւորգյանն էլ պնդում է, որ Սուքիասյանի հարցաքննության ավարտից հետո պարզ կդառնա առերեսում իր պաշտպանյալի եւ Սուքիասյանի միջեւ կլինի, թե՞՝ոչ:
«Դեռ հայտնի չէ առերեսման անհրաժեշտության մասին, բայց կարծում եմ, որ առերեսում կլինի, որովհետեւ էական հանգամանքներ կլինեն, որոնց շուրջ հակասություններ կառաջանան: Իսկ եթե հակասություններ չլինեն, ու Սուքիասյանը հաստատի այն փաստերը, որոնց մասին մենք խոսում ենք, կնշանակի՝ ինչ հայտարարում ենք, անհերքելիորեն հաստատվում են»,- ասաց պարոն Գեւորգյանը:
Մեր դիտարկմանը, թե լրատվամիջոցներին Աշոտ Սուքիասյանի փաստաբանն ասել էր, որ իր պաշտպանյալը իրեն մեղավոր չի ճանաչում, պարոն Գեւորգյանն ասաց՝ նման տեղեկություն իրեն չի հասել, ինքը նման բան չի լսել:
Նրանից նաեւ հետաքրքրվեցինք՝ ինչո՞ւ է Աշոտ Սուքիասյանի պաշտպան Յուրիկ Խաչատրյանը շրջանառության մեջ դրել Փայլակ Հայրապետյանի նկատմամբ քրեական գործ հարուցելու մասին լուրը եւ արդյոք հիմքեր կան նման գործ հարուցելու:
Կարդացեք նաև
Հիշեցնենք, որ պարոն Խաչատրյանը ԳԱԼԼԱ-ի հետ զրույցում իր ասածը այսպես էր հիմնավորել. «Աշոտին էլ են գցել եւ այդ գցողներին ճանաչել է նաեւ Փայլակ Հայրապետյանը եւ իրա հետ կապն էլ հնարավոր է: Հիմա ես չեմ կարող ռեալ հայտարարեմ, ուղղակի ինչ- որ բան հայտարարեմ, թող ամրապնդվի, հետո կխոսենք…
Բայց ոչինչ բացառված չէ, քննություն է եւ կարող է ցանկացած ժամանակ ցանկացած ընթացք ստանա»:
«Աշոտ Սուքիասյանին սատարող մարդկանց անհիմն, անտրամաբանական հայտարարություններն են: Նման հայտարարություն անելու համար ոչ կրթություն, ոչ էլ ուղեղ պետք չէ: Հոգեկան հիվանդն էլ կարող է նման հայտարարություն անել ու դրան բանի տեղ պետք չէ դնել»,- ի պատասխան ասաց Վաղարշակ Գեւորգյանը:
Նրա խոսքով, գործով նոր ձերբակալվածներ, հարցաքննվածներ չկան: Դեռ չի հստակեցվել Նավասարդ Կճոյանի եւ նախկին վարչապետ Տիգրան Սարգսյանի կարգավիճակները:
Արփինե ՍԻՄՈՆՅԱՆ
Լուսանկարում՝ Փայլակ Հայրապետյանն է
