Համաշխարհային հայ ոսկերիչների միությունը հոկտեմբերի 25-ից 28-ը կազմակերպում է արդեն 4-րդ անգամ տեղի ունեցող «Yerevan Show 2014» ոսկերչական ցուցահանդեսը, որը տեղի կունենա նորաբաց «Մերիդիան» էքսպո կենտրոնում՝ ազատ տնտեսական գոտու տարածքին կից գործող ցուցասրահում: Այս մասին այսօր Էկոնոմիկայի նախարարությունում կազմակերպած ասուլիսի ժամանակ ասաց ՀՀ Էկոնոմիկայի փոխնախարար Տիգրան Հարությունյանը: «Մենք հույս ունենք, որ այս կերպ կկարողանանք նպաստել Հայաստանում ոսկերչության եւ ժամագործության աճին»:
Փոխնախարարի խոսքով՝ այս ցուցահանդեսը լավ հնարավորություն է տարբեր երկրներից հրավիրված 150 ներկայացուցիչների ներկայացնելու հայկական ոսկերչական արտադրանքը։
Փոխնախարարը նաեւ հավելեց, որ մեծ է ցուցահանդեսի ընթացքում պետական ֆինանսավորումը. «Ոսկեգործությունը, ադամանդագործություն եւ ժամագործությունը մեր երկրում արտահանմանն ուղղված արդյունաբերության զարգացման համար գերակա ոլորտներից են եւ պետական աջակցությունն այստեղ մեծ է: Արդյունաբերության զարգացման հիմնադրամը բոլոր այն հայ ոսկերիչներին, որոնք մասնակցում են ցուցահանդեսին, ֆինանսավորում է՝ 50/50 »:
Համաշխարհային հայ ոսկերիչների միության փոխնախագահ Բերջ Աբաջյանը ասուլիսի ընթացքում տեղեկացրեց, որ ցուցահանդեսին այս տարի հյուրընկալելու են Ռուսաստանից, ԱՄՆ-ից, Կանադայից, Ֆրանսիայից, Իտալիայից, Շվեյցարիայից, Չեխիայից, ԱՄԷ-ից, Մեծ Բրիտանիայից եւ այլ երկրներից ոսկերչական ընկերությունների եւ ժամագործական ընկերությունների, փորձագետների եւ գնորդների. «Ցուցահանդեսը պետք է նպաստի, որպեսզի Հայաստանը դառնա ոսկերչության միջազգային կենտրոն»: Ցուցահանդեսին մասնակցելու են 27 երկրներից ավելի քան 150 ներկայացուցիչներ:
Կարդացեք նաև
Արդյունաբերության զարգացման հիմնադրամի տնօրեն Հայկ Միրզոյանն էլ տեղեկացրեց, որ այս տարի արդեն 22 տեղական ընկերություններ հայտ են ներկայացրել ցուցահանդեսին մասնակցելու համար եւ ցուցահանդեսի գործընկեր AJA ընկերության հետ համատեղ միջոցներ են ձեռնարկվում՝ տեղական արտադրողների համար զեղչեր անելու եւ համաֆինանսավորելու նպատակով:
Ցուցահանդեսը անցկացվելու է հոկտեմբերի վերջին շաբաթվա ընթացքում, քանի որ Հայաստանը հոկտեմբերի վերջին ամեն տարի տոնում է ոսկերչի տոնը:
Էլյա ՀՈՎՀԱՆՆԻՍՅԱՆ
