Այսօր ՀՀ գլխավոր դատախազությունը տարածել էր տեղեկատվություն այն մասին, որ հետաքննության և նախաքննության օրինականության նկատմամբ հսկողություն իրականացնելու գործառույթի իրականացման արդյունքում ՀՀ քննչական կոմիտեի Շենգավիթ և Մալաթիա-Սեբաստիա վարչական շրջանների քննչական բաժիններում քննվող գործերի նախաքննության ընթացքում արձանագրել է մի շարք չարաշահումներ:
ՀՀ գլխավոր դատախազության հատկապես կարևոր գործերով քննության վարչության դատախազների որոշումներով ՀՀ քննչական կոմիտեի Շենգավիթ վարչական շրջանի քննչական բաժնի պետի, նույն բաժնի քննիչի, ՀՀ քննչական կոմիտեի Մալաթիա-Սեբաստիա վարչական շրջանի քննչական բաժնի ավագ քննիչի կողմից իրենց վարույթում գտնվող քրեական գործերի նախաքննության ընթացքում պաշտոնեական լիազորությունները չարաշահելու դեպքերի առթիվ ՀՀ քրեական օրենսգրքի 308-րդ հոդվածի 1-ին մասի հատկանիշներով հարուցվել են քրեական գործեր:
Հարուցված քրեական գործերն ուղարկվել են ՀՔԾ՝ նախաքննություն կատարելու համար:
ՀՀ քննչական կոմիտեի նախագահի խորհրդական Սոնա Տռուզյանն Aravot.am-ի հարցին պատասխանեց. «Բնականաբար, իրազեկված ենք քրեական գործերի հարուցման հիմքերին։ Ըստ դատախազների կողմից կայացված որոշումների՝ առանձին քննիչների կողմից չեն պահպանվել դատավարական ժամկետները։ Ավելի ուշ քննչական կոմիտեն հանդես կգա հաղորդագրությամբ»:
Ռուզան ՄԻՆԱՍՅԱՆ
