Լեւոն Զուրաբյանը դատապարտում է իր ոտքի արարքը
«Իհարկե լավ բան չի, որ պարոն Ֆարմանյանը այդ պատահարի մասին վազել է լրատվական միջոցներ, և զոռ տալով երևակայությանը՝ սուտ ասել: Մեր ժողովուրդը լավ գիտի թե նման պատահարներից խոսողները ինչ են»,- այսօր խորհրդարանում, ճեպազրույցների ընթացքում հայտարարեց ՀԱԿ խմբակցության ղեկավար Լեւոն Զուրաբյանը`պատասխանելով իր եւ Սամվել Ֆարմանյանի միջեւ երեկ երեկոյան տեղի ունեցած միջադեպին:
Հիշեցնենք, որ «Հրապարակը» հաղորդել է՝ երեկ Ազգային ժողովի նիստի ավարտից հետո Սամվել Ֆարմանյանը և Լևոն Զուրաբյանը շարունակել են վիճել։ Վեճի առարկան եղել է Ֆարմանյանի հայտարարությունը, որ ԲՀԿ-ն իր ընտրատարածքում ԱԺ ընտրությունների ժամանակ փող է բաժանել հօգուտ ՀԱԿ-ի։ Այս հայտարարությունը այնքան է վրդովվեցրել Զուրաբյանին, որ նա պատիվ է պահանջել Ֆարմանյանից։ Վեճն այնքան է թեժացել, որ վերածվել է ծեծկռտուքի։ Սամվել Ֆարմանյանն այս առնչությամբ մասնավորապես ասել էր. «Նիստի ավարտից հետո ընտրակարգի փոփոխության վերաբերյալ օրենքի նախագծի քննարկումները շարունակվեցին նիստերի դահլիճին հարակից սրահում և նախագծի հիմնական հեղինակ պարոն Ռուբեն Հակոբյանի հետ, ինչպես միշտ, բարեկամաբար զրուցում էինք՝ բերելով յուրաքանչյուրս մեր փաստարկները:
Պարոն Զուրաբյանը «մեջ ընկավ»՝ օգտագործելով բառապաշար, որով հավանաբար իր հետ շփվում են իրենց տանը, ինչին ի պատասխան, այո, դաստիարակիչ ապտակ եմ տվել: Նման իրավիճակում, հավատացնում եմ, ցանկացած հայ տղամարդ կվարվեր նույն կերպ»:
Չհստակեցնելով, թե ինչից է ծագել խնդիրը, Լեւոն Զուրաբյանը ճեպազրույցում ասաց. «Ես օրինակ, հասկանում եմ Սամվել Ֆարմանյանին և ըմբռնումով եմ մոտենում նրա հոգական վիճակին, քանի որ, այնուամենայնիվ, նեղված է և դրա իրավունքն ունի, որովհետև մի քիչ մոտիկից է ծանոթացել իմ ոտքի հետ»:
Կարդացեք նաև
Նույն սարկազմով Լեւոն Զուրաբյանը շարունակեց. «Ես օբյեկտիվ մարդ եմ և ականատես եմ եղել այդ պատահարին: Կարող եմ հաստատել, որ իմ ոտքը, այնուամենայնիվ անցել է անհրաժեշտ ինքնապաշտպանության սահմանները: Ես դատապարտում եմ իմ ոտքի արարքը: Ես խիստ բարկացել եմ ոտքիս վրա»:
Այլ մանրամասները`տեսանյութում
Նելլի ԳՐԻԳՈՐՅԱՆ
Հազիվ մեկ անգամ Լեւոն Զուրաբյանը մի լավ բան է արել….