«Եվրատեսիլ» երգի միջազգային մրցույթն այս տարի կանցկացվի մայիսի 19-ին, 21-ին և 23-ին Ավստրիայի մայրաքաղաք Վիեննայում՝ «Կառուցելով կամուրջներ» խորագրի ներքո: Հայաստանի ելույթը նախատեսված է մայիսի 19-ին:
Մրցույթում, ինչպես հայտնի է, այս տարի մեր երկիրը կներկայացնի նոր ձևավորված «Genealogy» խումբը, որի անդամներն ազգությամբ հայ երիտասարդներ են:
Հինգ աշխարհամասերից եկած երգիչները՝ Եսայի Ալթունյանը (Եվրոպա), Թամար Կապրելյանը (Ամերիկա), Վահե Թիլբյանը (Աֆրիկա), Մերի-Ջին Օ’ Դոհերթի Վասմաթզյանը (Ավստրալիա), Ստեֆանի Թոփալյանը (Ասիա) և Ինգա Արշակյանը (Հայաստան) կներկայանան «Face the shadow» («Առերեսվի՛ր ստվերին») երգով: Երգի երաժշտության հեղինակը կոմպոզիտոր Արմեն Մարտիրոսյանն է, խոսքերի հեղինակը՝ Իննա Մկրտչյանը:
Տեսահոլովակի ռեժիսորը Արեն Բայադյանն է: Սյուժեի հիմքում ընկած է ծագումնաբանության գաղափարը: Ներկայացված գերդաստանը դիտարկվում է որպես մարդկության խորհրդանիշ, իսկ հիմքում ընկած է սերնդափոխության ֆենոմենը:
Կարդացեք նաև
«Genealogy» խմբի անդամ Եսայի Ալթունյանը երկու անգամ Ֆրանսիան ներկայացնելու հնարավորություն է ունեցել, սակայն ամեն անգամ մերժել է:
«Այս տարի առաջարկն ընդունեցի, որովհետև ինձ համար կարևոր է Հայաստանը ներկայացնել միջազգային մրցույթում»,- այսօր լրագրողների հետ հանդիպման ժամանակ ասաց ֆրանսահայ երգիչը:
Նրա ձևակերպմամբ՝ այդ օրը բեմում լինելու են տասը միլիոնով, ոչ թե վեց հոգով, քանի որ ներկայացնելու են ողջ հայությանը:
Ինգա Արշակյանը, որն արդեն հասցրել է Անուշ Արշակյանի հետ զուգերգով հանդես գալ միջազգային այս մրցույթում, ասում է, որ անակնկալի է եկել՝ ևս մեկ անգամ հրավեր ստանալով:
«Չեմ կարող բառերով արտահայտել այն հուզմունքն ու երջանկությունը, որ ապրեցի հրավերը ստանալու պահին: Որպես ինչ-որ չափով փորձառու մասնակից՝ կանեմ ամեն ինչ, որ որևէ խոչընդոտ չլինի»,- ասաց նա:
Օպերային երգչուհի Մերի-Ջին Օ’ Դոհերթին էլ ասաց, որ երբ նամակ է ստացել, սկզբում կարծել է՝ օպերային մրցույթ է:
«Ուրախ էի, որ «Եվրատեսիլ» մրցույթն է: Միշտ երազել եմ լինել Հայաստանում, ներկայացնել Հայաստանը համաշխարհային բեմերում: Ավստրալիայում իմ ուսուցչուհին Արաքս Մանսուրյանն է: Նա էլ էր ուզում, որ ես այցելեմ Հայաստան, իմանամ իմ արմատների մասին»,- պատմեց երգչուհին:
Երգչուհին ասաց, որ իր ընտանիքից ինքն առաջինն է, որ հնարավորություն է ստացել այցելելու Հայաստան:
«Եվրատեսիլ» երգի միջազգային մրցույթի հայաստանյան պատվիրակության ղեկավար Գոհար Գասպարյանն ասում է, որ խմբի անդամներին բավականին երկար ժամանակ են փնտրել: Նրանցից երկուսին՝ Եսայիին և Թամարին, նախապես ճանաչել են, իսկ մյուսներին համացանցով են փնտրել:
«Պետք է խոստովանեմ, որ հայտնաբերելով նման տաղանդավոր երգիչների՝ մենք բավականին զարմացած էինք, քանի որ մինչև այդ նրանց մասին չէինք լսել»,- նշեց Գոհար Գասպարյանը:
Սիրանուշ ՀԱՅՐԱՊԵՏՅԱՆ
