Բաց հասարակության հիմնադրամների մայիսի 21-ին «Խոշտանգումների արդյունավետ քննությունը Հայաստանում. Արդիական խնդիրները եւ միջազգային փորձը» կազմակերպած հանրային քննարկմանը ներկա էին նաեւ ոստիկանության եւ արդարադատության ներկայացուցիչներ:
Արդարադատության նախարարության մարդու իրավունքների եվրոպական դատարանի կապերի վարչության պետ Արտյոմ Սեդրակյանը նկատեց, որ քննարկման ընթացքում ասվել են խնդրի թե՛ դրական եւ թե՛ բացասական կողմերը:
«Չեմ կարող ընդունել, որ կառավարությունը կամ արդարադատության նախարարությունը որեւէ քայլ ինքնուրույն չի անում: Ըստ էության, նման բաժնի ստեղծումն առաջինն է ամբողջ ԵԽ պետություններում: Այդ համապարփակ վճիռների կատարման եւ ներդրման առումով որեւէ օրինակ մենք չունենք, այսօր մենք նույնիսկ մտածում ենք Եվրոպայի խորհրդի աջակցությամբ ներդնել առանձին կայք, որը լավ կլուսաբանի: Այսինքն՝ քայլեր կան»,- ասաց նա:
Կարդացեք նաև
Իսկ ոստիկանությունը ներկայացնում էր հերթապահ ծառայության վարչության պետ Վահրամ Աբրահամյանը: Անդրադառնալով Արտակ Զեյնալյանի կարծիքին, թե ոստիկանության ակադեմիայում քիչ տեղ է հատկացված խոշտանգումների ոլորտին՝ նա ասաց. «Ես միանշանակ համաձայն եմ, որ կրթությունը մեծ նշանակություն ունի: 2013 թվականից սկսած ոստիկանության պետի ցուցումով՝ մեր ակադեմիայում դասավանդվում են խոշտանգումների կանխարգելման մասին դասընթացներ»:
Նա նկատեց, որ վերջին մի քանի տարիների ընթացքում ոստիկանությունում բարեփոխումներ են կատարվել, որը ըստ նրա նաեւ հասարակական կազմակերպությունների աշխատանքի արդյունքն է. «Բավականին աշխատանք է իրականացվել այդ ուղղությամբ: Եթե մենք ընդունենք, որ 90-ական թվականներից մինչ օրս որեւէ բարեփոխում չի իրականացվել, մի կողմ դնենք ոստիկանության, ուժային կառույցների աշխատանքը, դրանով նաեւ թերագնահատում ենք մեր հասարակական կազմակերպությունների, հասարակական դիտորդական խմբերի, մարդու իրավունքների պաշտպանի աշխատանքը»:
Ամի ՉԻՉԱԿՅԱՆ
