Թեեւ գյումրեցի ակտիվիստները մի քանի օր է՝ չեն հեռանում Գյումրու Թատերական հրապարակից, գիշերում են այնտեղ՝ նստացույց անցկացնելով հոսանքի թանկացման դեմ, սակայն ամեն օր ժամը 18..00-ից սկսած քաղաքի բնակչությունը հավաքվում է այստեղ ու սկսվում է քայլերթը բոլոր փողոցներով: Այսօրվա բողոքի երթը իր տեսակի մեջ եզակի էր, բանն այն էր, որ հենց ժամը 18.00-ին սկսվեց հորդառատ անձրեւ, ու քանի որ Գյումրիում ջրահեռացման համակարգը ընդհանրապես չի գործում երկրաշարժից հետո, փողոցները անանցանելի են դարձել: Սակայն այս ամենը չխանգարեց գյումրեցիներին քայլերթ անցկացնելու ու բացականչելու. «Մենք ենք տերը մեր երկրի»:
Այս երթի մասնակիցների թիվը կրկնակի էր դարձել, միացել էին նաեւ գյումրեցի կանայք, որոնք սովորաբար բողոքի ակցիաների քիչ են մասնակցում: Անձրեւը գնալով ուժեղանում էր, իսկ երթի մասնակիցները էլ ավելի բարձր էին բացականչում ու հայրենասիրական երգեր կատարում:
Կարդացեք նաև
Բողոքի մասնակիցները անձրեւանոցներ էին պահում թրջվող ոստիկանների գլխին, որոնք չէին կարող ո՛չ պատսպարվել, ո՛չ էլ անձրեւանոցներ վերցնել, քանի որ շղթա կազմած ուղեկցում էին քաղաքացիներին: Մի պահ այլեւս անհնար էր դիմակայել անձրեւին, երթի մասնակիցները մտան Սուրբ Աստվածածին Յոթ վերք եկեղեցի ու սկսեցին աղոթքը:
Ոստիկանները եւս սկսեցին աղոթել ակտիվիստների հետ, նույնիսկ լուսանկարվեցին:
Տնտեսագետ Կարեն Պետրոսյանն ու փաստաբան Թամարա Յայլոյանը եկեղեցու աստիճանների վրա փոխոստիկանապետ Աշոտ Գրիգորյանին ասացին՝ ինչո՞ւ եք այդպես արագ անցնում մեր կողքով, եկեք դուք էլ մի հատ նկարվեք մեզ հետ: Փոխոստիկանապետը սիրով համաձայնեց:
Այնուհետ խաղաղ երթի մասնակիցները եկեղեցուց շարժվեցին դեպի Թատերական հրապարակ ու թրջված շորերով սկսեցին հայրենասիրական երգեր կատարել, շուրջպար բռնել: Մի այնպիսի մթնոլորտ է տիրում Թատերական հրապարակում, կարծես երկրաշարժից ավերված, տխուր քաղաքը վերակենդանացել, հարություն է առել:
Տնտեսագետ Կարեն Պետրոսյանը հայտարարեց, որ ոչ մի անձրեւ չի խանգարելու նստացույց անցկացնելու, քանի դեռ հոսանքի թանկացման մասին որոշումը չի կասեցվել: Այսօր եւս նստացույց կլինի քաղաքում: Նշենք, որ բողոքի երթի ցուցապաստառներից մեկի վրա Գյումրու բարբառով գրված էր. «Լույսը վառել եմ ու բդի վառեմ»:
Նունե ԱՐԵՎՇԱՏՅԱՆ
