«Օրեցօր ազատ անկման մեջ գտնվող միջազգային վարկանիշն Ադրբեջանը փորձում է փրկել տարբեր միջազգային ատյաններում: Բայց ապարդյուն: Փորձում է արդարացնել իր ավտորիտար վարչակարգը: Դրա վառ օրինակներից էր ԵԽԽՎ-ի բանաձեւի փորձը»,- այսօր, Չեխիայի արտաքին գործերի նախարարի հետ համատեղ մամուլի ասուլիսում ասաց ՀՀ արտաքին գործերի նախարար Էդվարդ Նալբանդյանը`պատասխանելով լրագրողներից մեկի հարցին:
Հիշեցնենք, Եվրոպայի խորհրդի խորհրդարանական վեհաժողովը (ԵԽԽՎ) ամառային նստաշրջանի լիագումար նիստում ձայների 140 «կողմ», 13 «դեմ», 8 «ձեռնպահ» հարաբերակցությամբ ընդունեց «Ադրբեջանում ժողովրդավարական ինստիտուտների գործունեությունը» զեկույցը: Նախապես այս զեկույցում տեղ էր գտել «Լեռնային Ղարաբաղի և յոթ այլ շրջանների գրավումը Հայաստանի կողմից» եզրույթը: Վերջնական տեքստում այդ եզրույթը փոխարինվել է «Վեհաժողովը քաջատեղյակ է Լեռնային Ղարաբաղի հակամարտության մասին» ձևակերպումով:
«Ակնհայտ է դառնում, որ ադրբեջանական նավթադոլարների օգտագործումը սրտխառնոց է սկսում առաջացնել եւ մի շարք պատգամավորներ իրենց քննադատությունն ու անհամաձայնությունը հայտնեցին»,- հավելեց ՀՀ արտգործնախարարը` նկատելով, որ վաղուց ժամանակն է, որ Ադրբեջանը «նավթախավիարային վիրտուալ վիճակից վերադառնա իրական վիճակի»: Էդվարդ Նալբանդյանի կարծիքով, դա օգտակար կլինի առաջին հերթին Ադրբեջանի համար:
Նելլի ԳՐԻԳՈՐՅԱՆ
