Քիչ առոջ Անդրիաս Ղուկասյանը մոտեցավ Երեւանի փոխոստիկանապետ Վալերի Օսիպյանին հայտնելու, որ ոստիկանությանը 30 րոպե են տրամադրում` որոշումը փոխելու համար. «Մենք գտնում ենք, որ այս հարցը պարզաբանելու համար պետք է որոշակի ժամանակ , մենք կսպասենք, որից հետո ձեր որոշումն է: Եթե դուք ձեր դիրքորոշումը չփոխեք, մենք դիմելու ենք քաղաքացիական անհնազանդության, այսինքն` այդ եղանակով փորձելու ենք մեր ոտնահարված իրավունքները պաշտպանել»:
Օսիպյանն ի պատասխան ասաց, որ այդ հայտարարությունն անթույլատրելի է ոստիկանության համար եւ չի կարելի նման կերպ խոսել ոստիկանության հետ: Նա հավելեց, որ բողոքի ակցիան անօրինական է. «Բացակայում են բոլոր տեսակի իրազեկումները, չկա լիազոր մարմնի կողմից ի գիտություն, դուք խախտում եք հավաքների ազատության մասին օրենքը»:
Օսիպյանը նշեց, որ ոստիկանությանը 30 րոպե տրամադրել պետք չէ, քանի որ որոշումն արդեն կայացված է. «Ձեր գործողություններն ի սկզբանե անօրինական են եւ տալ ձեզ այլ տարբերակ, եւս, անօրինական է, բայց քանի որ չի առնչվում երթեւեկելի մասին, չի խոչընդոտում քաղաքացիների ազատ տեղաշարժը, չի վտանգում վարորդներին ոստիկանությունը հանդուրժողականություն կցուցաբերի եւ այստեղ կապահովի հասարակական կարգը, մնացած բոլոր դեպքերում ձեր գործողություններն անօրինական են»:
Անդրիաս Ղուկասյանի եւ Վալերի Օսիպյանի զրույցից հետո կառավարության շենքի դիմացի մայթում ավելացան ոստիկաններ, որոնք պատ կազմեցին:
Ամի ՉԻՉԱԿՅԱՆ
