«Մենք նայում ենք խնդիրներին ոչ թե այսօրեական շահերի, այլ տնտեսության զարգացման հեռանկարի տեսանկյունից եւ հնարավորին սահմաններում ձգտել ենք երկարաժամկետ օգուտները գերադասել անմիջական եկամուտների գայթակղությունից»,- այսօր ԱԺ մշտական հանձնաժողովների համատեղ նիստում 2016-ի բյուջեի նախագծի քննարկման ժամանակ ասաց վարչապետ Հովիկ Աբրահամյանը:
Վարչապետը նշեց, որ 2016-ի պետական բյուջեն եւս ունի հստակ սոցիալական ուղղվածություն, որի մասին վկայում է այն հանգամանքը, որ բյուջետային ծախսերի ամբողջ ծավալի շուրջ կեսը կազմում են սոցիալական, կրթական, մշակութային եւ առողջապահության բնագավառների ծախսերը:
Ըստ վարչապետի «Շարունակելու ենք Լեռնային Ղարաբաղի Հանրապետությանը տրվող ֆինանսական աջակցությունը»:
Հովիկ Աբրահամյանը նշեց, որ բազմաթիվ միջազգային ընկերություններ, հեղինակավոր տնտեսագետներ 2015-ի տնտեսական զարգացումներն այս տարածաշրջանի համար ավելի ծանր են որակել, քան 2008-2009-ի ճգնաժամային տարիները. «Էներգակիրների գների կտրուկ տատանումներով են պայմանավորված տարադրամային տատանումները, տրանսֆերտների անկումը էականորեն դանդաղեցրեց տնտեսական աճի ներուժը՝ միաժամանակ ընդգծելով սոցիալական ծախսերն առավել բարձր արդյունավետությամբ իրականացնելու հրամայականը: Հանրային բարեկեցության միակ ճանապարհը ներդրումների խթանման միջոցով աշխատատեղերի ստեղծումն է: Հարկ է հնարավորինս խթանել հայրենի արտադրողին, խրախուսել արտահանումը, ստեղծել երկարատև կայուն աճի նախադրյալներ»:
Կարդացեք նաև
Նա ասաց, որ հարկատուների համար պայմանները դյուրացնելու են: Նախատեսում են արտոնությունների աստիճանական փոխարինում սուբսիդիաներով, սակայն միայն այն դեպքում, եթե հնարավոր լինի դրանց թիրախավորված տրամադրումը կարիքավոր խավին՝ փոխհատուցելով գների հնարավոր աճը: Նախատեսում են ապահովել բարեփոխումներ կարեւորագույն սոցիալական ոլորտներում: Բարեփոխումները պետք է իրագործվեն 3-5 տարիների ընթացքում:
Հարկային մեխանիզմների եւ վարչարարության աստիճանական բարձրացում է նախատեսվում եւ այդ սկզբունքների հիման վրա կազմվել եւ շրջանառության մեջ է դրվել նոր Հարկային օրենսգիրք: Վարչապետը հրավիրեց պատգամավորներին Հարկային օրենսգրքի քննարկումներին:
Պավել Սաֆարյանն էլ նշեց, որ 2016-ի տնտեսական աճն ավելի համեստ կլինի՝ հիմնականում պայմանավորված արտաքին զարգացումներով. «2016-ի ՀՆԱ-ի իրական աճը ծրագրավորված է 2.2 տոկոս, գնաճի թիրախը՝ 4-5.5 տոկոս: Բյուջեի դեֆիցիտը ՀՆԱ-ի նկատմամբ՝ 3.5 տոկոս: Պետական պարտքի ընդհանուր մակարդակը 2016-ի վերջի դրությամբ կանխատեսվում է 5 մլրդ 565 մլն դոլարի չափով, ընդ որում պետական պարտքի 86.6 տոկոսը բաժին կընկնի արտաքին պարտքին: Եկամուտների գծով մուտքերը սպասվում են 1 մլրդ 173 մլն դրամ, ծախսերը՝ 1 մլրդ 373 մլն դրամ: Եկամուտների մեջ մեծ կշիռ կունենան հարկերն ու պետտուրքերը»:
Հռիփսիմե ՋԵԲԵՋՅԱՆ
