Կառավարությանն առընթեր պետական գույքի կառավարման վարչության պետ Արման Սահակյանը կառավարության այսօրվա նիստում ներկայացրեց որոշման նախագիծ, որով վարչության աշխատակազմին ամրացված Երևանի Տերյան 2 հասցեում գտնվող 98 մլն 633 հազար դրամ գնահատված արժեքով 198.6 քմ ընդհանուր մակերեսով շենքը և դրա զբաղեցրած հողատարածքը հետ է վերցվում «Հայաստանի ազգային կինոկենտրոն» ՊՈԱԿ-ից և ներդրվում է «Հայաստանի հանրային ռադիոընկերություն» ՓԲԸ կանոնադրական կապիտալում որպես կանոնադրական կապիտալում՝գնահատված արժեքով:
Վարչապետ Հովիկ Աբրահամյանը հետաքրքրվեց, թե ինչու է նախկինում այդ ամբողջ շենքը էժան վաճառվել: «Էն ժամանակ առաջարկվում էր վաճառել 500 հազար դոլարով: Եթե մենք միայն 200 մետրը հիմա մոտ 300 հազար դոլար ենք գնահատում, շենքը էն ժամանակ ինչի՞ էր էդքան էժան գնահատվել, ի՞նչն էր պատճառը: Վաճառել էինք, չէ՞ 500 հազարով էդ շենքը»,- ասաց Հովիկ Աբրահամյանը:
Արման Սահակյանը հստակ պատասխան չտվեց:
«Էս հարցը կքննարկենք»,- խիստ տոնով նշեց վարչապետը:
Կարդացեք նաև
Նելլի ԲԱԲԱՅԱՆ
