«Հայկական վերածնունդ» կուսակցության տեսակետները ԵՄ Արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինիին, Ազգային ժողովի ընդդիմադիր խմբակցությունների ներկայացուցիչների հետ հանդիպման ընթացքում, ներկայացրել է ԱԺ պատգամավոր Մհեր Շահգելդյանը:
Խոսելով Լեռնային Ղարաբաղի հակամարտության կարգավորման մասին՝ Մհեր Շահգելդյանը շեշտել է, որ հիմնախնդիրը պետք է լուծվի բացառապես բանակցությունների միջոցով:
Պատգամավորը ասել է, որ «Հայկական վերածնունդը» հանդես է եկել Սահմանադրական բարեփոխումների հանրաքվեի ընթացքում տեղ գտած ընտրակեղծիքների և խախտումների կոշտ քննադատությամբ:
Նա նաև ընդգծել է, որ, ընտրական գործընթացները թափանցիկ և ժողովրդավարական չափանիշներով ապահովելու համար, նոր Ընտրական օրենսգրքում պետք է ամրագրվեն դրույթներ, որոնք իրավական պատնեշ կլինեն ընտրակեղծիքների առաջ ինչպես 2016թ. ՏԻՄ ընտրությունների, այնպես էլ 2017թ. Խորհրդարանական ընտրությունների ժամանակ: Նա փաստել է, որ նոր Ընտրական օրենսգրքի շուրջ առկա է ընդդիմության համագործակցություն:
Կարդացեք նաև
Որպես կարևոր դրույթ՝ «Հայկական վերածնունդ» կուսակցության ներկայացուցիչը կարևորել է քվեարկած քաղաքացիների ընտրացուցակների հրապարակումը՝ ասելով, որ իշխանությունների կողմից լսվող տեսակետը, թե ցուցակների հրապարակումը չի համապատասխանում Եվրախորհրդի առաջ քաշած չափանիշներին, ըստ էության, քննադատությանը չի դիմանում:
Անդրադառնալով ազատ և թափանցիկ ընտրություններ անցկացնելու հարցին՝ նա շեշտել է, որ դրա առաջնային նախապայմանը իշխանությունների քաղաքական կամքն է:
«Հայկական վերածնունդ» կուսակցություն