Էրեբունի եւ Նուբարաշեն վարչական շրջանների ընդհանուր իրավասության դատարանում մարտի 15-ին դատավոր Տաթեւիկ Ստեփանյանը հրապարակել է Վարդան Պետրոսյանի եւ Հակոբյանների միջեւ կնքված հաշտության համաձայնագրի որոշումը:
Այս մասին Aravot.am-ին հայտնեց Վարդան Պետրոսյանի պաշտպան Նիկոլայ Բաղդասարյանը: Նա ասաց, որ երկու համաձայնագիր է կնքվել, առաջին համաձայնագրով Վարդան Պետրոսյանը պարտավորվել է հատուցել Տաթեւիկ Հակոբյանի բուժման ամբողջ ծախսը, եւ երկրորդը, որպեսզի դադարեցվի ամբողջ գործընթացը եւ իր դեմ որեւէ պահանջ այլեւս չներկայացվի, Վարդան Պետրոսյանը առաջարկել է 2 միլիոն վճարել:
Մեր նկատառմանը, թե կողմը պահանջում էր փոխհատուցել նաեւ փաստաբանների վարձատրության գումարը, Նիկոլայ Բաղդասարյանն ասաց. «Իրենք, ըստ հաշտության համաձայնագրի, հրաժարվել են որեւէ պահանջ ներկայացնել, որի դիմաց էլ Վարդան Պետրոսյանը վճարել է 2 միլիոն: Որեւէ պահանջի դիմաց ինքը չի վճարել, այլ ընդհակառակը՝ պահանջ չներկայացնելու դիմաց է վճարել»:
Ամի ՉԻՉԱԿՅԱՆ
