«Կինս պլակատ էր բռնել, ընկել էր գետնին…ոստիկանները կնոջս գցել էին գետնին`մի հինգ ոստիկան շրջապատած, ոտի տակ էր ընկնում, ես այդ ժամանակ հասա վրա, որպեսզի չհարվածեն, չխփեն: Այդ ոստիկաններին կարողացա մի րոպե հրել, բայց իրենց դա դուր չեկավ եւ ինձ բերման ենթարկեցին»,- Aravot.am-ի հետ զրույցում ասաց «Հիմնադիր խորհրդարանի» անդամ Կարոն Եղնուկյանը, որն արդեն ոստիկանության բաժանմունքից ճանապարհվել էր հիվանդանոց:
Միջադեպը տեղի է ունեցել Մաշտոցի պուրակի դիմաց տեղի ունեցած ցույցի ժամանակ: Կարո Եղնուկյանի կինը «Հայ կանանց ճակատ»-ի անդամ է։ Բերման են ենթարկվել մեկ տասնյակից ավելի ակտիվիստներ:
Արդեն ոստիկանական բաժանմունքում Կարո Եղնուկյանն իմացել է, որ կինը գլխին հարված է ստացել, գլխի վրա պատռվածք կա. «Հիմա հիվանդանոցում է, հետազոտություն են անում`տեսնենք, թե ինչ կասեն: Ինքը երկար ժամանակ ուշքի չէր գալիս, որովհետեւ զանգեցի, չէր կարողանում հետս խոսել»:
Ոստիկանության բաժանմունքում Կարո Եղնուկյանը բացատրություններ չի տվել, ոչ էլ իրեն են բացատրել, թե ինչի՞ համար է բերման ենթարկվել. «Ասեցի`շուտ թողեք`գնում եմ հիվանդանոց: Իրենց սահմանափակված բանով ինձ ավելի շուտ ազատեցին: Մեկ-մեկուկես ժամ էնտեղ էի»:
Կարդացեք նաև
Մյուս բերման ենթարկվածներից Կարո Եղնուկյանը տեղեկություններ չունի. «Միտքս ու սիրտս միայն հիվանդանոց հասնելն էր»: Մեր զրուցակիցը տեղեկացրեց, որ Մարդու իրավունքների պաշտպանի գրասենյակի ներկայացուցիչները ոստիկանության բաժանմունքում էին:
Նելլի ԳՐԻԳՈՐՅԱՆ
