«Երևանի կենտրոնը խիստ ծանրաբեռնված է, և կառուցապատելու տեղ այլևս չկա»,- «Երևանում քաղաքաշինական զարգացման միտումներն ու սեյսմիկ անվտանգության խնդիրները» թեմայով «Մեդիա կենտրոն»-ում այսօր կազմակերպված քննարկման ժամանակ իր մտահոգությունը հայտնեց ՀՀ ճարտարապետների միության նախագահ Մկրտիչ Մինասյանը:
«2000-ականների սկզբին մենք չկարողացանք մեզ համար պարզել, թե Երևանի համար ինչն է առաջնակարգ, ինչ հուշարձաններ կան, որոնք պետք է պահվեն, ինչ հատվածներում պետք է կառուցապատում ընթանա: Կառուցապատման նախագծեր պետք է լինեին, որոնցով կառաջնորդվեինք: Մինչդեռ, հախուռն շինարարությունը բերեց նրան, որ մի կողմից զրկվեցինք պատմական, հուշարձանային արժեք ունեցող շենքերից, մյուս կողմից էլ ունեցանք խիտ կառուցապատում՝ օկուպացնելով նաև հանրային կանաչ տարածքները, կառուցապատման համար քաղաքից վերցնելով յուրաքանչյուր քառակուսի մետրը»,- ասաց ճարտարապետը:
«Հայնախագիծ» ինստիտուտի ճարտարապետ Սաշուր Քալաշյանն իր հերթին նկատեց, որ խիտ կառուցապատումը և վերնահարկերի կառուցման գործընթացը վտանգեցին խորհրդային տարիներին կառուցված բնակելի շենքերի սեյսմակայունությունը. «Խորհրդային տարիներից մեզ ժառանգություն հասած շենքերը չեն համապատասխանում ներկայիս սեյսմիկ պահանջներին և ամրացման կարիք ունեն: Այդ շենքերը կառուցված են մինչև 7 բալ սեյսմակայունությամբ, մինչդեռ հիմա պահանջվող բալը 9-ն է:
Կոնստրուկտիվ համակարգին մեծ վնաս հասցվեց, երբ անկախության տարիներին համատարած սեփականաշնորհում սկսվեց, շենքերի նկուղային հարկերը վաճառվեցին՝ օգտագործվելով հանրային կամ այլ նպատակների համար: Վերնահարկերի կառուցմամբ վիճակն էլ ավելի վատթարացավ»,- նշեց Սաշուր Քալաշյանը:
Կարդացեք նաև
«Շենքերը մշտական խնամքի կարիք ունեն,- նկատեց ՀՀ ԱԻՆ «Սեյսմիկ պաշտպանության ծառայություն» գործակալության շենքերի և շինությունների սեյսմակայունության բաժնի պետ Արմեն Արտոնյանը,- բնակիչներն էլ են հաճախ իրենց գործունեությամբ թուլացնում շենքի սեյսմակայունությունը՝ բնակարանում փոփոխություններ անելով, հիմնական պատերը ձևափոխելով և այլն»:
Դառնալով Հայաստանում հին շենքերն ուժեղացնելու և ներկայիս սեյսմակայունության պահանջներին համապատասխանեցնելու խնդրին՝ ՀՀ քաղաքաշինության նախարարի խորհրդական Ալեքսանդր Մովսիսյանն ասաց, որ իրենք մոտավոր հաշվարկներ են արել և պարզել, որ դրա համար 30-31 միլիարդ դոլար է անհրաժեշտ:
«Հայաստանում վթարային 26 շենք կա, որոնք պետք է քանդվեն: Նոր շենքերի կառուցման համար ֆինանսական լուրջ ներդրումներ են պետք»,- ընդգծեց նա:
Ալեքսանդր Մովսիսյանը չի ժխտում, որ ներկայիս կառուցապատումները շատ հաճախ խախտումներով են ընթանում. «Հաշվի առնելով այն, որ այդ խախտումները հիմնականում տեղի են ունենում Կենտրոնում, նախարարության կողմից օրենք է մշակվել Երևանի փոքր կենտրոնի վերաբերյալ: Օրենքը, որն արդեն ԱԺ-ում է, Կենտրոնում կառուցապատման վերաբերյալ լուրջ սահմանափակումներ կմտցնի»,- հայտնեց բանախոսը:
Սիրանուշ ՀԱՅՐԱՊԵՏՅԱՆ
