Շենգավիթ վարչական շրջանի ընդհանուր իրավասության առաջին ատյանի դատարանում ապրիլի 14-ին շարունակվում էր Ավետիք Իսահակյանի անվան կենտրոնական գրադարանի աշխատակից Վեներա Թորոսյանի գործով դատական նիստը:
Դատական նիստից հետո լրագրողներին հաջողվեց իրենց հարցերն ուղղել Վեներա Թորոսյանին, սակայն վերջինս շարունակ պնդում էր «չխախտել իր անձնական կյանքի սահմանադրական իրավունքները» եւ չստիպել իրեն մտնել լրագրողների հետ դիալոգի մեջ:
«Ես ընդունեցի իմ մեղքը, եւ ես կկրեմ պատիժ ինչքան, որ սահմանված է դատարանի կողմից: Ինձ ուրիշ ոչ ոք իրավունք չունի դատելու եւ ինչ-որ բան ավելացնելու»,- ասաց նա:
Նա պնդեց, որ հրահանգ չի եղել, իրեն ոչ ոք չի հրահանգել գնալ այդ քայլին:
Կարդացեք նաև
Այս գործով վճիռը կհրապարակվի ապրիլի 19-ին:
Հիշեցնենք՝ Վեներա Թորոսյանը մեղադրվում է սահմանադրական փոփոխությունների հանրաքվեի օրը այլ անձանց փոխարեն քվեարկելու մեջ: Նրան մեղադրանք է առաջադրվել, որ նա Սահմանադրության փոփոխությունների հանրաքվեի ժամանակ Երեւան քաղաքի Շեւչենկո փողոցի թիվ 34/1 հասցեում գտնվող թիվ 8/31 ընտրական տեղամասում, լինելով հանձնաժողովի նախագահ, այլ անձանց` Նարեկ Ալեքսանյանի եւ Վալենտինա Ալեքսանյանի փոխարեն քվեարկելու դիտավորությամբ` նշված ընտրատեղամասի ընտրողների ցուցակում վերջիններիս անվան դիմաց լրացրել է պատահական` համապատասխանաբար անձնագրային տվյալները եւ ստորագրել վերջիններիս փոխարեն, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:
Ամի ՉԻՉԱԿՅԱՆ
