«Նոր Հայաստան» հանրային փրկության ճակատն այսօր «Կոնգրես» հյուրանոցում կազմակերպեց խորհրդաժողով`«Անվտանգության ճգնաժամի հաղթահարման արտակարգ քայլերը» թեմայով, որի ընթացքում ներկայացվեցին ապրիլյան «դիրքային պատերազմ»-ի հետևանքով ՀՀ-ում առաջացած անվտանգության ճգնաժամի բնութագիրը, պատճառները և դրանք հաղթահարելու քայլերը:
«Ճգնաժամը բացահայտվեց ապրիլյան «դիրքային պատերազմ»-ի հետևանքով: Անշուշտ, այդ խնդիրները կային, բայց շատերի համար տեսանելի չէին: Հայ ժողովուրդը հայտնվել է գոյութենական սպառնալիքին դեմ հանդիման: Փաստորեն, հայտնվել ենք մի իրավիճակում, երբ մեր ռազմավարական դաշնակից համարվող Ռուսաստանը, ՀԱՊԿ անդամ մյուս պետությունները, եւ առհասարակ` միջազգային հանրությունը գնահատական չտվեցին Ադրբեջանի ագրեսիային, իսկ Ադրբեջանը զինված է արդիական մահացու սպառազինությամբ: Տարածաշրջանում առհասարակ ձեւափոխություններ են տեղի ունենում, նոր դերակատարներ են ի հայտ գալիս, օրինակ` Իսրայելը, որը ռազմարդյունաբերական բաղադրիչով մեծ մասնակցություն է ունեցել, Թուրքիան եւս ներգրավված է, եւ մենք կարող ենք փաստել, որ մենք Մերձավոր Արեւելքի բաղադրիչ ենք: Պետք է հասկանանք, որ մենք ենք լինելու մեր գլխի տերը եւ ուրիշի վրա չենք կարող հույս դնել»,-Aravot.am-ի հետ զրույցում ասաց «Նոր Հայաստան» հանրային փրկության ճակատի քաղաքական խորհրդի անդամ Վարուժան Ավետիսյանը:
Նրա ձեւակերպմամբ` բավական է սփոփվել այն կեղծ համոզմունքով, թե ստեղծված իրավիճակում Հայաստանին որեւէ գերտերություն կպաշտպանի. «Անհրաժեշտ է համայն հայության ներուժի համախմբում, իսկ դրա համար առաջին հերթին պետք է ունենալ վստահություն վայելող կառավարություն: Այսօրվա կառավարությունը բացարձակապես վստահություն չունի, հակառակը` հասարակության ատելության օբյեկտն է: Շատ շտապ մեզ հարկավոր է ժողովրդի վստահությունը վայելող հասարակական-քաղաքական միավորումների համախմբում, ժողովրդի կողմից վստահելի կառավարության ձեւավորում` լեգիտիմ իշխանություն ապահովելու համար, ինչն իր հերթին կապահովի երկրի կայունությունը եւ կերաշխավորի արտահերթ ընտրությունների օրինականությունը»:
«Նոր Հայաստան»-ի ծրագիրը ենթադրում է նաեւ պաշտպանական ոլորտի հզորացում. «Դա ենթադրում է արդյունավետ կադրային քաղաքականություն եւ եղած կադրերի փոփոխություններ, բանակի համար նյութական միջոցների կուտակում եւ բանակի թվաքանակի ավելացում, օրինակ, ոստիկանական ներուժի հաշվին եւ ոչ միայն»,-ասաց Վարուժան Ավետիսյանը:
Կարդացեք նաև
Հետաքրքրվեցինք, թե ինչ կարծիքի է օլիգարխներին «կուլակաթափ» անելու եւ նրանց միջոցների հաշվին բանակը զինելու կոչերի մասին: «Դա պետք է դիտարկել օրենքի սահմաններում` ինչպես կարող են այդ ապօրինի ձեռք բերված միջոցները ներգրավվել երկրի պաշտպանության ամրապնդման հարցում: Այդ միջոցների օրինականացման խնդիր է առաջանալու: Որեւէ մեկը նպատակ չի հետապնդելու հալածելու եւ ունեզրկելու… դրա մասին խոսք չկա: Պարզապես բոլորը պետք է հասկանան, որ ինչ-որ պահից պետք է կանգ առնել: Թող կոշտ չհնչի, բայց եթե ժողովրդից գողացել են, պետք է վերադարձնեն ժողովրդին»,-նշեց պարոն Ավետիսյանը:
Լուիզա ՍՈՒՔԻԱՍՅԱՆ
հետաքրքիր է… օլիկարգների նկատմամբ զգուշութեա՜մբ, նոյնիսկ վախով է արտայայտվում, մինչ բնաւ այդպէս չի խօսում կառավարութեան մասին…
երեւի անհատական փողը աւելի վախնալիք է,
քան թէ պետական տարրական հեղինակութիւնը
կեցցէ՛ քաջ յեղափոխականը…