Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանի լիագումար նիստի ընթացքում բանավեճ տեղի ունեցավ ԵԽԽՎ-ում հայկական պատվիրակության անդամ Սամվել Ֆարմանյանի և Ադրբեջանի պատվիրակության անդամ Գանիրա Փաշաևայի միջև:
Պարոն Ֆարմանյանը բավականին կոշտ ելույթ ունեցավ ապրիլի սկզբին Ադրբեջանի` ղարաբաղաադրբեջանական սահմանին իրականացրած ռազմական գործողությունների վերաբերյալ:
Կարդացեք նաև
Այս ելույթը, բնականաբար, դուր չեկավ ԵԽԽՎ-ում ադրբեջանական պատվիրակությանը: Ուստի ի պատասխան պարոն Ֆարմանյանի ելույթի` Գանիրա Փաշաևան հայտարարեց, թե պարոն Ֆարմանյանը սուտ է խոսում և նշեց, թե իբր ռազմական գործողությունները սկսել է Հայաստանը, ոչ թե Ադրբեջանը: Նա վստահեցրեց, որ իրենք ունեն դա ապացուցող տեսանյութեր, լուսանկարներ:
Այնուհետև սկսեց գովերգել իր ադրբեջանամետ դիրքորոշմամբ աչքի ընկնող ԵԽԽՎ նախագահ Պեդրո Ագրամունտին` նշելով, թե նա միշտ հավասարակշռված լուծումներ է առաջարկել, ուստի այս պարագայում էլ նույնն են ակնկալում նրանից:
Դառնալով Սամվել Ֆարմանյանի հնչեցրած այն մտահոգություններին, թե Ադրբեջանի ծավալած ռազմական գործողությունների պատճառով տասնյակ զոհեր են գրանցվել, Գանիրա Փաշաևան հարց հղեց նրան՝ այդ մարդիկ ի՞նչ գործ ունեին Ադրբեջանի տարածքում, որ կորցրել են իրենց կյանքը:
Տաթև ՀԱՐՈՒԹՅՈՒՆՅԱՆ
