ԱԺ պետաիրավական հարցերի հանձնաժողովում Ընտրական օրենսգրքի նախագիծն է քննարկվում: Կառավարության աշխատակազմի ղեկավար-նախարար Դավիթ Հարությունյանը ներկայացրեց վերջնական տարբերակը, ըստ որի՝ էլեկտրոնային գրանցումից բացի, նաեւ մատյանային գրանցում են անելու, որովհետեւ սարքի վրա հույս չի կարելի դնել, տեխնիկա է, կարող է փչանալ: Սա նաեւ ընդդիմության առաջարկն էր՝ ի՞նչն է խանգարում, որ գրանցվեն եւ ստորագրեն նաեւ մատյանում:
Ուշագրավ է կանանց մասնակցության հետ կապված կառավարության փոփոխությունը: Եթե գործող Ընտրական օրենսգրքում կուսակցությունների համամասնական ցուցակի ամեն 5-րդը պետք է կին լիներ, ապա առաջարկվող փոփոխությամբ յուրաքանչյուր 4 թեկնածուի մեջ մեկը պետք է կին լինի: Կուսակցությունների ցուցակում յուրաքանչյուր սեռի ներգրավվածությունը չպետք է անցնի 75 տոկոսը:
Յուրաքանչյուր խմբակցություն պետք է ունենա իգական սեռի ներկայացուցիչ: Եթե ինչ-ինչ պատճառներով թեկնածուն ինքնաբացարկ է հայտնում, ապա ցուցակի հաջորդ ներկայացուցիչները բաց պետք է թողնեն իրենց հերթը, որ մանդատը հասնի կնոջը:
Այն մտահոգությանը, որ նույնականացման քարտերով քվեարկելու դեպքում նկար չի երեւում՝ Դավիթ Հարությունյանը պատասխանեց, որ այդ քարտերի ինֆորմացիայի մեջ նկար կա, մասնագետը կարող է բացել նկարը եւ տեսնել՝ նմա՞ն է մարդուն այդ լուսանկարը, թե՞ ոչ:
Կարդացեք նաև
Հռիփսիմե ՋԵԲԵՋՅԱՆ
