Երեւանի Աջափնյակ եւ Դավիթաշեն վարչական շրջանների Ընդհանուր իրավասության դատարանում այսօր` մայիսի 11-ին, դատավոր Վարդան Աբրահամյանի նախագահությամբ շարունակվեց հիրոմանտ, էքստրասենս Անի Մաջնունյանի սպանության գործով քննությունը:
Հիշեցնենք, որ Մաջնունյանի սպանության մեջ մեղադրվում է «Յանուս» արտիստական թատրոնի տնօրեն եւ գլխավոր ռեժիսոր, 1995 թ. ծնված Մուշեղ Մխիթարյանը:
Դատավորին զեկուցվեց, որ տուժողի իրավահաջորդը` Անի Մաջնունյանի եղբայրը, տեղափոխվել է ՌԴ, այդ պատճառով էլ Մաջնունյանի մայրը` Տիկին Լորետան, դիմում է ներկայացրել` խնդրանքով, որ իրեն ճանաչեն որպես տուժողի իրավահաջորդ: Կողմերն այս առնչությամբ առարկություններ չներկայացրեցին, եւ դատարանի որոշմամբ` տիկին Լորետան տուժողի իրավահաջորդ ճանաչվեց: Չնայած առողջական խնդիրներին, նա ներկայանալու է առաջիկա նիստերին:
Այսօրվա դատական նիստին 4 վկաները կրկին չէին ներկայացել: Ոստիկանության համապատասխան բաժիններից տեղեկատվություն էր ստացվել, որ նրանցից մեկը փոխել է բնակության վայրը, մյուսն էլ` գտնվում է Կիպրոսում: Ցուցմունք տվեց միայն Մարիամ Մարտիրոսյանը: Նա դատավորին հայտնեց, որ ամբաստանյալ Մուշեղ Մխիթարյանին մեկ անգամ է տեսել` Անի Մաջնունյանի սպանության դեպքի օրը: Ամբաստանյալն էլ ասաց, որ վկային նախկինում չի ճանաչել:
Կարդացեք նաև
«Այլ մանրամասների տեղյակ չեմ, ուղղակի դեպքի օրը երեկոյան Անիենց տանն էի, երբ ներս եկավ ինքը, ես էլ դուրս եկա: Իրենք բավականին ջերմ էին, բարեւեցին իրար: Անին մայրիկիս ընկերուհին էր: Մայրս մահացել էր, գնացել էի Անիի հետ խոսելու: Ներս մտավ Մուշեղը: Ինձ թվաց, թե նա խմած է, մի քիչ տարօրինակ էր իրեն պահում: Ուշադիր նայում էր ինձ, ես նստած էի բազմոցին, նա էլ մյուս բազմոցին նստեց: Հասկացա, որ իրենք խոսելու բան ունեն, այդ պատճառով ես դուրս եկա` ժամը մոտ 23:00-ի կողմերը: Անիի հետ պայմանավորվեցի, որ հետո կգամ»,-պատմեց Մարիամը:
Նա հաստատեց, որ ճանաչում է Անի Մաջնունյանի նախկին ամուսնուն` Գաբրիելին, որից էլ վերցրել է Անիի հեռախոսահամարը:
Հիշեցնենք, որ այս մասին դատարանում որպես վկա պատմել էր նաեւ Գաբրիելը:
Նիստի ընթացքում ամբաստանյալ Մուշեղ Մխիթարյանը միջնորդություն ներկայացրեց դատավորին` իր խափանման միջոց համարվող կալանքը ստորագրությամբ երկրից չհեռանալու մասին որոշմամբ փոխարինելու խնդրանքով: Դատավոր Աբրահամյանը կրկին տեղյակ պահեց, որ դրան կանդրադառնան միջնորդությունների քննարկման փուլում` վկաների հարցաքննության փուլի ավարտից հետո:
Հաջորդ դատական նիստը նշանակվեց մայիս 20-ին` ժամը 13:00-ին: Հիշեցնենք, որ նախորդ նիստի ընթացքում Մուշեղ Մխիթարյանն ասել էր, որ չի ցանկանում ներկա գտնվել դատական նիստերին:
Լուիզա ՍՈՒՔԻԱՍՅԱՆ
