Հայաստանում ընտանեկան օրենսդրությունը եւ երեխաների իրավունքների պաշտպանությանը վերաբերող օրենսդրական կարգավորումները բավարար են, չնայած պրակտիկ կիրառության մեջ են խնդիրներ առաջանում: Այսօր երեխաների պաշտպանության միջազգային օրվա առիթով «Պոստ սկրիպտում» ակումբում անդրադառնալով երեխաների իրավունքներին՝ նման կարծիք հայտնեց փաստաբանների պալատի հանրային պաշտպանի գրասենյակի փաստաբան Մարինե Ֆարմանյանը:
Նրա խոսքերով՝ որքան էլ օրենսդրական կարգավորումներ լինեն, հիմնականում մեծ բեռն ընկնում է ընտանիքում բարոյական փոխհարաբերությունների վրա:
Արդյոք տարածվա՞ծ են մեր երկրում երեխաների նկատմամբ բռնությունները, փաստաբանն ասում է՝ շատ չեն. «Մենք մենթալիտետով տարբերվում ենք, որ երեխաներին աստվածացնում ենք, հետեւաբար բռնությունները շատ չեն»:
Ֆարմանյանի կարծիքով՝ ընտանեկան իրավունքն ու երեխաների պաշտպանության ոլորտը նուրբ է, կտրուկ լուծումներ չպետք է տրվեն։
Կարդացեք նաև
Փաստաբանի դիտարկմամբ՝ ընտանեկան հարաբերությունների վրա անմիջական ազդեցություն են թողնում Քաղաքացիական դատավարության բացթողումները: Օրինակ՝ ալիմենտի բռնագանձման պահանջի, երեխաների հետ տեսակցության նշանակման հետ կապված հարցերը. երկար ձգձգվող դատական գործընթացի պատճառով ալիմենտի բռնագանձման պահանջին երկար ժամանակ լուծում չի տրվում:
Ըստ փաստաբանի. «Հայցվորը դիմում է դատարան: Դատական նիստերը երկար ժամանակ ձգձգվում են, քանի որ դատարանները խայտառակ ծանրաբեռնված են: Կինը, որը վատ հարաբերություններ ունի ամուսնու հետ, ալիմենտի բռնագանձման պահանջ է ներկայացնում՝ հույս ունենալով, որ կարճ ժամանակ անց այդ ալիմենտը կտրվի, կկարողանա իր երեխայի կարիքները հոգալ, սակայն դատական նիստերը նշանակվում են ուշ-ուշ: Այդ ընթացում առկախ է մնում, թե ինչպես պետք է երեխայի կարիքները հոգալ»:
Ինչ վերաբերում է տեսակցություններին, ապա Ֆարմանյանը նկատեց՝ այստեղ եւս խնդիրներ են առաջանում դատարանների ծանրաբեռնվածության պատճառով. հայցվորը դիմում է դատարան եւ մի քանի տարի չի կարողանում տեսնել երեխային. «Այս վիճակը բարոյահոգեբանական վատ ազդեցություն է թողնում 2 կողմի վրա էլ»:
Փաստաբանի խոսքերով՝ իր պրակտիկայում հաճախ է հանդիպում դեպքերի, երբ դատական գործընթացի ձգձգումների պատճառով դատական վեճերը տեղափոխվում են ընտանեկան առօրյա ու ծնողները երեխայի ներկայությամբ սկսում են վիճաբանել: Այս երեւույթը, փաստաբանի գնահատմամբ՝ ազդում է երեխայի վրա եւ, երբ ծնողները վիճում են երեխայի ներկայությամբ նրանց կողմից բռնություն է երեխայի նկատմամբ. «Քանի որ ծնողներն իրենց վարքագծով ազդում են երեխայի հոգեբանության վրա»:
Նելլի ԲԱԲԱՅԱՆ
