Հայաստանի նկարիչների միության Արա Սարգսյան ցուցասրահը օրերս զարդարված էր Երևանի Զարդարվեստի ուսումնարանի սաների ձեռքի աշխատանքներով:
Ուսումնարանում հիմնականում դասավանդում են արվեստի ճյուղեր՝ մանրանկարչություն փայտի, մետաղի փորագրություն, գոբելենագործություն, ոսկերչություն,արծաթագործություն, խեցեգործություն, գեղարվեստական ձևավորման աշխատանքներ և դիզայն: Փոխտնօրեն Ա. Հունանյանի խոսքով, սրահում ներկայացված նմուշները 15-ից 17 տարեկան երեխաների ձեռքի աշխատանքներն են: Բացի մասնագիտական կրթությունից, ուսումնարանում ստանում են նաև հանրակրթական՝ միջնակարգ կրթություն:
Տնօրեն Լուսինե Բարսեղյանն անկեղծանում է. «Մեզ համար երազանք է եղել երբևէ հասնել այն կետին, որ կարողանանք նման ցուցասրահում ներկայացնել ուսանողների աշխատանքները. այսօր այդ օրն է»: Նա հպարտությամբ է նշում, որ այսօր հանճարեղ սերունդ ունենք և հուզմունքով շնորհակալություն հայտնում նաև ուսումնարանն ավարտած 17 տղաների ընտանիքներին, ովքեր անմահացան 44 օրյա պատերազմում և հատուկ ընդգծում, որ նաև նրանց անձնազոհության շնորհիվ է, որ այսօր իրականություն է դարձել այս ցուցահանդեսը:
Կարդացեք նաև
Քանաքեռ-Զեյթուն վարչական շրջանի Կրթության, մշակույթի և սպորտի վարչության պետ Սամվել Ադամյանը ներկայացված աշխատանքներում հայրենանվեր ու պետականամետ դաստիարակության շունչ է նկատում. «Աշխարհում կա մի ընդհանուր լեզու՝ մշակույթը և տիրապետելով դրան կարող ես ճանաչվել ամբողջ աշխարհում, դրանցից մեկն էլ գեղարվեստն է: Ոչ մի լեզու պետք չէ իմանալ՝ հասկանալու տվյալ ազգի մշակույթը, իսկ այս ցուցահանդեսը տեսնելով կարելի է շատ բան իմանալ մեր երկրի անցյալի, ներկայի ու գալիքի մասին»:
Անմիջապես ցուցասրահում ստեղծագործում և աշխատում էին ուսումնարանի բարձր կուրսի ուսանողները: Մանրանկարչության բաժնի 3-րդ կուրսի ուսանողուհի Նանե Պատվականյանն, օրինակ, սկսել էր դիպլոմային աշխատանքը: Թեման Աստվածաշնչյան դրվագներից էր, մասնավորապես Հիսուսի կյանքը, մկրտությունը, բանտումը, խաչելությունը և համբարձումը: Նանեի խոսքով, թեմայի ընտրությունը պատահական չէ.
«Կարծում եմ հիմա մենք այն վիճակում ենք, որ հավատը մեզ համար՝ որպես քրիստոնյա ազգ, իսկապես շատ կարևոր է»:
Ցուցասրահի մեկ այլ հատվածում փայտի, փորագրության բաժնի 3-րդ կուրսի ուսանող Ռոբիկ Սարգսյանն անշունչ փայտից գյուղական պատկերներ էր ստեղծում՝ ներկայացնելով տեսարան նաև Հ. Թումանյանի «Անուշ» պոեմից: Ռոբիկն ասաց, որ հայոց բանակում պարտքը կատարելուց հետո, մտադիր է ուսումը շարունակել Գեղարվեստի ակադեմիայում:
Ուսումնարանի վարպետներից Հրայր Մովսիսյանն իր խոսքում ընդգծեց, որ ներկայացված բոլոր աշխատանքներն արվել են դասի ընթացքում:
Ցուցահանդեսի համար հատուկ Հայաստան ժամանած «Ուրարտու» հայ-չեխական միության նախագահ Ալեքսանդր Սարգսյանը հիանալով աշխատանքներով՝ հիշեցրեց, որ դեռևս 16-րդ դարում Չեխիայի արքա Կարլ 4-րդը Հայաստանից հրավիրել էր 380 մասնագետի, որոնց մեջ կային ոսկերիչներ, փայտագործներ, և նշեց, որ այսօր Չեխիայի Հանրապետության շատ հին կառույցներում ներկայացված է հայկական գեղեցիկ մշակույթը. «Ես վստահ եմ, որ այս երիտասարդների գործերը վաղը նույնպես տարածվելու են ամբողջ աշխարհում՝ բարձր պահելով մեր ժողովրդի պատիվը»:
Երաժիշտ Արա Գևորգյանն էլ հպարտությամբ նշեց, որ ինքը ևս այս ուսումնարանի շրջանավարտ է: Սովորել է դրվագման բաժնում: Այսօր ներկա գտնվելով ցուցահանդեսին, ուրախ է, որ ստեղծված ավանդույթները շարունակվում են բարձր մակարդակով՝ շնորհիվ ուսումնարանի վարպետների և տնօրինության ջանքերի:
Փիրուզա ՄՈՒՍԱՅԵԼՅԱՆ
