Եզդի ժողովուրդը ապրելով հայոց երկրում, դարեր շարունակ հավասարապես կիսել է ինչպես խաղաղ ու ուրախ օրերի երջանկությունը, այնպես էլ ծանր օրերի դժվարությունները: Եզդի ժողովրդի ճակատագիրը հատկապես վերջին հարյուրամյակի ընթացքում սերտորեն կապված է եղել հայ ժողովրդի եւ Հայաստանի ճակատագրի հետ: Դրա վառ ապացույցը դարձավ Արցախյան շարժումն ու պատերազմը, ինչպես նաեւ 2016թ. ապրիլյան քառօրյա պատերազմը, որի ընթացքում զոհվեցին նաեւ 5 եզդի զինծառայողներ:
Այժմ էլ ազգությամբ եզդի զինվորները շարունակում են եզդի ժողովրդի լեգենդար զավակ Ջահանգիր աղայի գործը, որը չխնայելով իր կյանքն ու ունեցվածքը, կանգնեց հայ ժողովրդի կողքին:
«Եզդի եւ հայ ժողովուրդների բարեկամություն» հասարակական կազմակերպությունը Հայաստանի ողջ եզդի բնակչության անունից դիմել էր Երեւանի քաղաքապետարան խնդրանք-առաջարկով՝ Ավան վարչական շրջանի տարածքում գտնվող Շահինյան փողոցի 4-րդ նրբանցքը անվանակոչել հայ եւ եզդի ժողովուրդների անխախտ բարեկամության մեծ երախտավոր Ջահանգիր աղայի անունով:
Երեւանի քաղաքապետարանի ավագանու 2016թ. մայիսի 25-ի նիստի որոշմամբ հարգեցին մեր խնդրանքը եւ վերոհիշյալ փողոցն անվանակոչեցին Ջահանգիր աղայի անունով:
Անվանակոչության միջոցառումը տեղի կունենա հունիսի 4-ին, ժամը 12-ին:
Ս. ԲԱՔՈՅԱՆ
«Եզդի եւ հայ ժողովուրդների բարեկամություն»
հ/կ նախագահ
«Առավոտ»
04.06.2016
