«Բրեժնեւը, որ կարդում էր, մի տող բաց էր թողնում: Իմ մոտ էլ էր….»,- «Ազգային միասնություն» շարժման մարզային կառույցների ներկայացուցչական հավաքին այսօր Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանն այսպես արդարացրեց իր տեքստը կարդալիս տողերը շփոթելը:
Նա խոսեց քառօրյա պատերազմի, 21-րդ դարի մարտահրավերների մասին՝ ասելով. «Մենք չենք կարող անտարբեր մնալ, հանգիստ նստել եւ սպասել, թե ինչ տեղի կունենա եւ ինչ է սպասվում մեզ»:
Արա Աբրահամյանը խոսեց նաեւ մեր երկրում առկա խնդիրների մասին. «Հայաստանը պետք է լինի տնտեսապես ու սոցիալապես հզոր եւ համախմբված: Ցավոք, հզոր լինելու համար մենք դեռեւս լուրջ ճանապարհ ունենք անցնելու: Զգալի բացթողումներ կան ՀՀ տնտեսական սոցիալական զարգացման, պաշտպանության եւ այլ բնագավառներում: Արտագաղթի կասեցման ուղղությամբ ձեռնարկվող միջոցառումները դեռեւս բավարար չեն»:
Նա ասաց, որ բանակաշինության մեջ լուրջ տեղ է զբաղեցնում կոռուպցիան, որը հայտնի դարձավ հատկապես ապրիլյան պատերազմից հետո. «Իշխանությունները պետք է քաղաքական կամք դրսեւորեն արատավոր այս երեւույթները բացառելու համար»:
Կարդացեք նաև
Նա ցուցանիշներ ներկայացրեց, թե ինչքան խորն է արտագաղթը մեր երկրում: Նա ասաց, որ Հայաստանի հզորացման գործում պետք է սփյուռքն էլ ակտիվանա, գործարար միջավայրը սփյուռքի:
Նա խոսեց հոկտեմբերին ՀՀ-ում անցկացվելիք տնտեսական ֆորումի մասին՝ համոզմունք հայտնելով, որ այն կարեւոր դեր կխաղա ՀՀ ներդրումային դաշտի բարելավման վրա:
Արա Աբրահամյանը նաեւ այսպիսի առաջարկ արեց՝ մի համաժողով-քննարկում էլ կազմակերպել Արցախյան հարցի շուրջ. «Պետք է ՀՀ եւ Արցախի անվտանգության հարցերով զբաղվենք, համազգային համախմբում անենք: Պետք է ցույց տանք, որ դա ոչ միայն հայաստանցիների, այլեւ միլիոնավոր սփյուռքի խնդիրն է»:
Նա ասաց, որ տեղեկատվական պատերազմի հարցում մենք հետ ենք ընկել, հաճախ ենք պարտվում, Ադրբեջանը քառօրյա պատերազմից հետո համագումար է արել, ողջ մեղքը բարդել մեր վրա, հայտարարություն ընդունել, ուղարկել այն բոլոր երկրների ներկայացուցիչներին, միջազգային կառույցներին: Ուստի առաջարկ արեց Սերժ Սարգսյանին, որ մենք էլ անենք՝ հրավիրենք համահայկական համաժողով. «Լավ է ուշ, քան երբեք: Միաժամանակ գտնում եմ, որ անհրաժեշտ է ստեղծել համահայկական համագործակցության համակարգող մարմին՝ ՀՀ նախագահի գլխավորությամբ»:
Նա հորդորեց բարի երթ մաղթել իրենց շարժմանը եւ ելույթի վերջում ասաց. «Հեռավոր տեղից եմ եկել՝ Ամերիկայից, ուստի այնքան լավ չեմ զգում: Քանի որ այսօր կազմակերպվել էր ժողովը, ես ելույթ պետք է ունենայի, բավականին երկար ելույթ էր, հոգնեցի»:
Հռիփսիմե ՋԵԲԵՋՅԱՆ
