Անցեալ երկու շաբաթները ճգնաժամային եղան Էրեբունիի մէջ ծաւալած իրադարձութիւններուն հետեւող համայն հայութեան համար: Զինեալ մարդիկ ներխուժեցին այդ շրջանի ոստիկանութեան կեդրոնը, գրաւեցին զայն ու ճակատումի դուրս եկան իշխանութեանց դէմ: Այս ճգնաժամը կառավարութեան դէմ ցոյցեր սկսելու դրդապատճառ եղաւ: Մինչեւ այս իրադարձութեանց աւարտը, երկու ոստիկաններ սպաննուեցան եւ տասնեակներով քաղաքացիներ վիրաւորուեցան: Բազմաթիւ հարցականներ այսօր կը յուզեն մեզ, ու տակաւին պէտք է գտնել պատասխանը, թէ այս կէտէն դէպի ո՛ւր պիտի շարժինք:
Իբրեւ սփիւռքեան համայնք, մենք միշտ գիտակից ենք, որ հայաստանեան իրադարձութիւնները ըմբռնելու եւ անոնց մեր մասնակցութիւնը ճիշդ հունաւորելու համար պարտինք լայնօրէն իրազեկուիլ անոնց մասին: Այսուհանդերձ, մեր մասնակցութիւնը հայ ժողովուրդի եւ հայրենիքի առօրեային երբե՛ք չէ եղած վաղանցուկ երեւոյթ մը, որ մերթ կը սաստկանայ ու մերթ կ՛անհետի: Ազգակերտումը յարատեւ եւ յաճախ դժուարութիւններով առլցուն գործընթաց է, որուն յաջողութիւնը բացառապէս կախեալ է ժողովրդավարական եւ լուծումներ հետապնդող մօտեցումներէ:
Պետութեան պարտականութիւնն է ապահովել իր քաղաքացիներուն բարօրութիւնը. այս սրբազան պարտաւորութենէն կարելի չէ խուսափիլ: Դժգոհութիւն յառաջացնող պայմաններն ու ճնշումներով անոնց հակադարձելու վարքագիծը՝ քաղաքացիները յուսահատութեան հասցնող հոգեվիճակ ստեղծած են: Այս վտանգաւոր եւ անարդարանալի կացութեան լուծում մը պէտք է գտնել:
Հայաստանի կառավարութենէն մենք կը պահանջենք թափանցիկ քննութիւն կատարել անցեալ երկու շաբաթներուն ընթացքին լիազօրութիւններու չարաշահումով իրագործուած բոլոր արարքներուն շուրջ, եւ քայլեր ձեռք բերել՝ բոլոր կալանուածներուն համար դատական արդար գործընթաց երաշխաւորելու:
Կարդացեք նաև
Կը պահանջենք յարգե՛լ Հայաստանի քաղաքացիներուն խօսքի ազատութեան եւ հաւաքներ կազմակերպելու իրաւունքը, ինչպէս նաեւ՝ պաշտպանել լրագրողները, որպէսզի անոնք կարենան առանց կաշկանդումի ու վախի՝ առարկայականօրէն տեղեկագրել երկրին մէջ ընթացող դէպքերուն մասին:
Կոչ կ՛ուղղենք Հայաստանի մեր քոյրերուն ու եղբայրներուն, որ շարունակեն առանձնապէս խաղաղ՝ առանց բռնութիւններու ընկերային բարեփոխումներ իրականացնելու իրենց նախաձեռնութիւնները: Մենք պէտք է գիտակցինք, թէ կազմակերպուած ժողովուրդը անյաղթահարելի ուժ եւ քաղաքական դրամագլուխ կը կուտակէ միայն, երբ իր ձեռնարկումները ընթանան բացառապէս խաղաղ ճանապարհներով:
Աւելի բարւոք Հայաստան մը ունենալու շարժումը երբե՛ք կանգ չի կրնար առնել, ոչ ալ այդ շարժումը աշխարհագրականօրէն սահմանափակուած կրնայ ըլլալ: Այդ շարժումը կրնայ յաջողութեան հասնիլ, միայն եթէ անոր իրենց մասնակցութիւնը բերեն մեր ժողովուրդի բոլոր հատուածները՝ քննարկումներու, բանավէճի ու բողոքի ճամբով, որուն եզրակացութիւնը պիտի վճռուի քուէարկութեամբ:
Մեր հանրապետութեան ճակատագիրը ո՛չ կաշառակերներու, ո՛չ ալ լկտիներու կամքէն կախեալ կրնայ ըլլալ: Երեւանի, Ստեփանակերտի, Լոս Անճելըսի եւ Սփիւռքի այլ շրջաններու գաղափարապաշտ, սկզբունքային, յառաջադէմ ու անվհատ հայորդիներն են, որոնք միասնաբար պիտի կերտեն ա՛յն հայրենիքը, որուն արժանի է մեր ազգը:
ԱՐԵՒՄՏԵԱՆ ԱՄԵՐԻԿԱՅԻ
ՀԱՅ ԵՐԻՏԱՍԱՐԴԱՑ ԴԱՇՆԱԿՑՈՒԹԻՒՆ