«Ի դեպ, ինձ շատ հաճելի է արձանագրել եւ ուզում եմ Ձեզ շնորհավորել այդ առիթով, ես նայել եմ անցյալ տարվա տվյալները` ԵԱՏՄ-ին Հայաստանի անդամակցությունից հետո ՀՆԱ-ն ձեզ մոտ աճել է 10 %-ով, ինչպես երեւում է փաստաթղթերից: Դա, իհարկե, շատ դրական ցուցանիշ է»,-երեկ այս մասին ասել է ՌԴ նախագահ Վլադիմիր Պուտինը՝ ՀՀ նախագահ Սերժ Սարգսյանի հետ հանդիպման ժամանակ:
Այսօր կառավարության նիստից հետո ՀՀ ազգային վիճակագրական ծառայության ղեկավար Ստեփան Մնացականյանի հետ ճեպազրույցում հետաքրքրվեցինք, թե այդ ի՞նչ 10% է նշել Պուտինը: Մնացականյանը փորձեց հաշվել եւ կարծիք հայտնեց, որ գուցե ինչ-որ մեկը 2014-2015 թվականների եւ ընթացիկ տարվա առաջին եռամսյակի ՀՆԱ-ն է հաշվել եւ իրար գումարել: 2014-15 թվականներն իրար հետ 10% աճ չի տալիս, լրագրողների այս դիտարկմանը Մնացականյանը պատասխանեց՝ 2014-ին 3.6% է եղել, 2015-ին՝ 3%, ինդեքսային եղանակով դա լինում է 6.6%: Ապա հասկանալով, որ ՀՆԱ-ն 10%-ով չի աճել եւ Պուտինը սխալ թիվ է ներկայացրել, Մնացականյանն ասաց.«Հարցն ինձ չպետք է ուղղեք: Այդ հարցը Պուտինին պետք է տաք»:
Ապա Մնացականյանը փորձեց իրավիճակը փրկել եւ ասաց.«Կայքում տեղադրված են բոլոր ցուցանիշները՝ ըստ տարիների: Խնդիրն այն է, որ միշտ պետք է ցուցանիշը ներկայացնելիս ժամանակն ու տարածությունը մեկ ծիրի բերել»:
Նելլի ԲԱԲԱՅԱՆ
