Երևանում ընթացող Երեխաների սնուցման համաշխարհային 18-րդ համաժողովի մասնակիցները Հայաստանի դպրոցներում իրականցվող դպրոցական սննդի ծրագրին ծանոթանալու նպատակով սեպտեմբերի 8-ին այցելել են Արարատի մարզի դպրոցներ: Այս մարզում դպրոցական սնունդն իրականցվում է պետական բյուջեի ֆինանսավորմամբ: ՀՀ ԿԳ նախարարի խորհրդական Բագրատ Եսայանի տեղեկացմամբ՝ հանրապետության 1390 դպրոցներից 1150- ը, այսինքն ՀՀ բոլոր մարզերի կրտսեր դպրոցներն ընդգրկված են դպրոցական սննդի ծրագրում:
Դրանցից Արարատի, Վայոց Ձորի և Սյունիքի մարզերի թվով 260 դպրոցները ներառված են ազգային ծրագրում: «Ծրագրի մեկնարկից 4 տարի հետո Արարատի, Վայոց ձորի և Սյունքի մարզերի դպրոցներում դպրոցական սննդի ծրագիրը Պարենի համաշխարհային ծրագրի կողմից փոխանցվել է պետությանը և այժմ այս 3 մարզերում ֆինանսավորումն ամբողջությամբ կատարվում է ՀՀ կառավարության կողմից: Մնացած 7 մարզերում ծրագրի ֆինանսավորումը կատարվում է Պարենի համաշխարհային ծրագրի կողմից՝ Ռուսաստանի Դաշնության դոնորությամբ: Մենք նախատեսում ենք, որ տարեցտարի ազգային ծրագրի շրջանակն ընդլայնվելու է. 2017-ին դպրոցական սննդի ազգային ծրագրում կընդգրկվի նաև Տավուշի մարզը, իսկ հետագա երկու տարիներին Շիրակի և Արագածոտնի մարզերը»,- նշել է Բ. Եսայանը և հավելել, որ Արարատի, Վայոց ձորի և Սյունիքի մարզերի դպրոցների 50 տոկոսում կազմակերպված է տաք ճաշ, մնացած դպրոցներում դեռևս տրամադրվում է սառը սնունդ / թխվածքաբլիթ և հյութ/: Բ. Եսայանի խոսքով՝ համապատասխան սարքավորումներ հատկացվել են ազգային ծրագրում ընդգրկված բոլոր դպրոցներին, սակայն կախված ֆինանսավորման և ծնողական համայնքի ներգրավվածության չափերից, որոշ դպրոցներում տաք սննդի կազմակերպման համար միջոցները չեն բավարարում. «Մենք փորձելու ենք բոլոր դպրոցներին տաք սննդի կազմակերպման հնարավորություն տալ: Այժմ ուսումնասիրություն է կատարվում այն դպրոցներում, որտեղ սարքավորումներ կան, սակայն տաք սնունդ չի կազմակերպվում: Նախատեսվում է ստեղծել հատուկ հիմնադրամ, որը ամենայն հավանականությամբ կնախաձեռնի տաք սննդի մատակարարում դպրոցներին»,- տեղեկացրել է Բ. Եսայանը՝ հավելելով, որ հիմնադրամի ստեղծումից մի քանի տարի անց դպրոցական սննդի ծրագրում նախատեսվում է ընդգրկել նաև Երևանը:
Երեխաների սնուցման համաշխարհային 18-րդ համաժողովի մասնակիցների մարզային շրջայցի առաջին կանգառը Արարատի մարզի Սիսավան համայնքի միջնակարգ դպրոցում էր, որտեղ դպրոցական սնունդը տրվում է տաք ճաշի տեսքով: Դպրոցի տնօրեն Ն. Գալստյանի տեղեկացմամբ դպրոցն ունի 300 աշակերտ, որոնցից 145-ը / կրտսեր դպրոցի ու նախակրթարանի սաները/ օգտվում են դպրոցական սննդից: Երեխաների սնուցման համաշխարհային 18-րդ համաժողովի պատվիրակները Սիսավանի դպրոցում ծանոթացել են դպրոցական սննդի կազմակերպման համար ստեղծված պայմաններին՝ խոհանոցային գույքին, ճաշացանկին, խոհարարների աշխատաոճին ու աշակերտների նախասիրություններին: Դպրոցի տնօրենը, ներկայացնելով ծրագրի իրականացման ընթացքը՝ նշել է, որ բացի կառավարության հատկացրած ֆիանսավորումից, որը յուրաքանչյուր երեխայի համար կազմում է օրական մոտ 150 դրամ, իրենք ստանում են նաև ծնողական համայնքի աջակցությունը. «Ծնողական կամավոր աջակցությունը շատ կարևոր է այս ծրագրի հաջողության համար: Դրա շնորհիվ դպրոցական սննդի ճաշացանկը դառնում է ավելի բազմազան: Օրինակ, երեխաները մեզ մոտ ստանում են նաև միս, միրգ, բանջարեղեն, որն ապահովվում է ծնողական համայնքի ներդրումների շնորհիվ»,- նշել է տնօրենը:
Դպրոցում շրջայց կատարելուց հետո հյուրերը Սիսավանի դպրոցի բակում մասնակցել են ծառատունկի, ինչպես նաև ունկնդրել սաների երգուպարի կատարումները: Օտարերկրացի հյուրերը հայ փոքրիկների հետ փորձել են մասնակցել հայկական ազգային պարերի կատարմանը, ինչպես նաև լուսանկարվել նրանց հետ:
Երեխաների սնուցման համաշխարհային 18-րդ համաժողովի մասնակիցները, որոնց թվում են 65 երկրների 250 ներկայացուցիչներ, այդ թվում՝ մոտ երկու տասնյակ նախարարներ այցելել են նաև Վեդու թիվ 1 և թիվ 2, Արտաշատի թիվ 1 և թիվ 2, Արալեզ համայնքի դպրոցներ:
ՀՀ կրթության և գիտության նախարարություն
