Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանում այսօր` սեպտեմբերի 27-ին, շարունակվեց «Հիմնադիր խորհրդարանի» անդամ Գեւորգ Սաֆարյանի գործի քննությունը: Հիշեցնենք, որ քաղաքացիական ակտիվիստը հունվարի մեկին բերման էր ենթարկվել Ազատության հրապարակից` «Հիմնադիր խորհրդարանի» անդամների եւ ոստիկանների միջեւ տեղի ունեցած միջադեպի պատճառով: Նա մեղադրվում է ոստիկանության մայոր Գեղամ Խաչատրյանին հարվածելու համար:
Նիստին ներկա էին Գեւորգ Սաֆարյանի կողմնակիցները: Վերջինիս դատարան մտնելուն պես նրանք ծափահարեցին եւ վանկարկեցին` «Գեւորգ-Գեւորգ…»:
Հարցաքննվեց վերջին վկան` Արթուր Պետրոսյանը: Նա ներկայացավ որպես օպերային թատրոնի հարեւանությամբ գործող գիշերային սրճարանի անվտանգության աշխատող: Պատմեց, որ Ամանորի գիշերը ծառայության մեջ է եղել, երբ կեսգիշերն անց դուրս է եկել ակումբից` մաքուր օդ շնչելու. «Տեսել եմ, որ օպերայի հարթակում վիճաբանություն, քաշքշուկ է տեղի ունենում` քաղաքացիների եւ ոստիկանության ծառայողների միջեւ: Դրսում գտնվել եմ 2-3 րոպե: Դրանից հետո շարունակել եմ ծառայությունս գիշերային սրճարանում»:
Դատախազի հարցերին ի պատասխան՝ Արթուր Պողոսյանը հայտնեց, որ ըստ իր տեսածի` վիճաբանության մասնակից-քաղաքացիները թվով շատ էին ոստիկաններից: Դատախազը հետաքրքրվեց` «աղմո՞ւկ էր, հայհոյանքներ հնչո՞ւմ էին»: Վկան պատասխանեց, որ. «Այո, հայհոյանքներն ուղղված էին ոստիկանության ծառայողներին»: Հետո հավելեց, որ «հայհոյանքները վերացական բնույթ էին կրում»: Հաշվի առնելով վկայի հակասական պատասխանը` դատախազը կրկին խնդրեց պարզաբանել` ինչպե՞ս հասկացավ, որ հայհոյանքները ոստիկաններին էին ուղղված: Արթուր Պողոսյանն այդպես էլ հստակ պատասխան չտվեց` ասելով. «Ոստիկաններն աշխատում էին կանխել այդ իրավիճակը…»:
Կարդացեք նաև
Վկայի պատասխանները պարբերաբար առաջացնում էին նիստին ներկաների քմծիծաղը:
Իր հերթին ամբաստանյալ Գեւորգ Սաֆարյանը եւս փորձեց ճշտել` վկան ինչպե՞ս հասկացավ, որ հայհոյանքների հասցեատերերը ոստիկաններն էին. «Ինչի՞ց ենթադրեցիք` «ես քո սենց-ընենցը» ո՞ւմ էր ուղղված»: Վկան շարունակեց պնդել. «Հնչում էին ոստիկանության ծառայողների հասցեին…»:
Լուիզա ՍՈՒՔԻԱՍՅԱՆ
