ՀՀ տրանսպորտի, կապի և տեղեկատվական տեխնոլոգիաների նախարարի հրամանով տրանսպորտի բնագավառում իրականացվող օրենսդրական բարեփոխումների շրջանակում մշակվող օրենսդրական ակտերի, նախագծերի վերաբերյալ հասարակական կազմակերպությունների և մասնավոր հատվածի դիրքորոշումը ստանալու, քննարկելու և դրանք նախարարին ներկայացնելու նպատակով ստեղծվել է աշխատանքային խումբ:
Նոյեմբերի 11-ին տեղի ունեցավ աշխատանքային խմբի անդրանիկ նիստը։
ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արամ Արսենյանը ներկայացրեց աշխատանքային խմբի գործունեության նպատակներն ու շրջանակները, նշեց, որ հանդիպումները լինելու են շարունակական, իսկ քննարկումները՝ նպատակային, մանրամասն և լիարժեք։
Աշխատանքային խումբը ղեկավարում է նախարարության Լիզենզավորման գործակալության պետ Աշոտ Սահակյանը: Աշխատանքային խմբում ընդգրկված են մի շարք հասարակական կազմակերպությունների ներկայացուցիչներ, այդ թվում են «Քաղաքացիական դիրքորոշում» ՀԿ նախագահ Գևորգ Դոստուրյանը, «Ավտովարորդների պաշտպանության լիգա» ՀԿ նախագահ Տիգրան Հովհաննիսյանը, «Հայաստանի միջազգային փոխադրողների ասոցիացիա» ՀԿ նախագահ Հերբերտ Համբարձումյանը, այլք։
Նիստում քննարկված հարցերը վերաբերում էին ավտոտրանսպորտի տեխնիկական զննման նոր կանոնակարգերի մշակմանը և տաքսամոտորային փոխադրումները կանոնակարգող օրենսդրական դաշտի վերանայմանը՝ հավասար մրցակցային պայմաններ սահմանելուն։
Կարդացեք նաև
Քննարկվող խնդրի շուրջ իրենց տեսակետներն արտահայտեցին Հայաստանի տաքսի ծառայությունների գործատուների ճյուղային միության նախագահ Վահագն Սահակյանը, «Հայաստանի սպառողների ասոցիացիա» ՀԿ նախագահ Արմեն Պողոսյանը, «Իրազեկ ու պաշտպանված սպառող» ՀԿ նախագահ Բաբկեն Պիպոյանը, «Աջակցություն տաքսի սերվիսներին» ՀԿ նախագահ Արմեն Թամազյանը, այլք։
Նիստի ավարտին աշխատանքային խմբի ղեկավար Աշոտ Սահակյանը նշեց, որ նիստի արձանագրությունն ու խմբի անդամների դիրքորոշումները կներկայացվեն ՀՀ տրանսպորտի, կապի և տեղեկատվական տեխնոլոգիաների նախարարին։
ՀՀ տրանսպորտի, կապի և տեղեկատվական տեխնոլոգիաների
նախարարության լրատվական ծառայություն
