Կենտրոնական ընտրական հանձնաժողովն այսօրվա արտահերթ նիստում քննարկեց փետրվարի տասներկուսին Արարատի, Արմավիրի Կոտայքի, Սյունիքի, Շիրակի , Գեղարքունիքի, Արագածոտնի մարզերում ՏԻՄ ընտրություններին ընտրական տեղամասային հանձնաժողովներում քարտուղարների ու հանձնաժողովների նախագահների պաշտոնների բաշխման հարցը:
Հանձնաժողովի որոշմամբ, պաշտոնները բաշխվեցին ԱԺ խմբակցությունների միջեւ հետեւյալ հերթականությամբ. ՀՀԿ-ն կունենա չորսական հանձնաժողովի նախագահ, նույնքան քարտուղար, ԲՀԿ-ն՝ երեքական նախագահ, նույնքան քարտուղար, «Ժառանգությունը» եւ ՀՅԴ-ն չեն նշանակի հանձնաժողովի նախագահներ ու քարտուղարներ, իսկ «Հայկական վերածնունդն» ու ՀԱԿ-ը մեկական նախագահ ու քարտուղար կնշանակեն:
ԿԸՀ քարտուղար Սմբատյանի խոսքով, ձեւավորվել են ինը տեղամասեր: Իսկ կուսակցություններն այդ համայնքներում հանձնաժողովականների նշանակումներ անելու համար իրենց հայտերը ԿԸՀ պետք է ներկայացնեն հունվարի 13-18-ն ընկած ժամանակահատվածում:
Պարոն Սմբատյանի ներկայացմամբ, արտահերթ ընտրություններ են լինելու Շիրակի՝ Արեւիկ ու Սյունիքի՝ Վարդավանք համայնքներում, այստեղ հանձնաժողովի նախագահների ու քարտուղարների նշանակումները հանձնաժողովը որոշեց վիճակահանությամբ:
Կարդացեք նաև
Ըստ որի, Արեւիկում ՀՀԿ-ն կունենա քարտուղար, ԲՀԿ-ն՝ նախագահ, իսկ Վարդավանքում՝ հակառակը, ԲՀԿ-ն քարտուղար, ՀՀԿ-ն՝ նախագահ:
Այս համայնքներում նշանակումներ անելու համար կուսակցությունների հայտեր ներկայացնելու վերջնաժամկետը հունվարի 23-25-ը ընկած ժամանակահատվածն է:
Արփինե ՍԻՄՈՆՅԱՆ
