Ուրիշ տարբերակ չկա, որ ԹՐԻՓՓ-ի երկու մուտքն ու ելքը չլինի Ադրբեջանից. խորհրդարանում կառավարության հետ հարցուպատասխանի նիստում ասաց Նիկոլ Փաշինյանը։
«ԹՐԻՓՓ-ը Ադրբեջանի սահմանից՝ Ադրբեջանի սահման է, և տասնյակ անգամներ սրա մասին հայտարարել ենք»,- ասաց Նիկոլ Փաշինյանը՝ պատասխանելով «Ուժեղ Հայաստան» խմբակցության պատգամավոր Մարիաննա Ղահրամանյանի հարցին։
Ընդդիմադիր պատգամավորը մեջբերեց ԹՐԻՓՓ-ի վերաբերյալ Ադրբեջանի ԱԳ նախարար Ջեյհուն Բայրամովի հայտարարությունը. «Երեկ ձեր ադրբեջանցի գործընկերը՝ Բայրամովը, անդրադառնալով TRRIP նախագծին, արել է հետևյալ հայտարարությունը։ Մեջբերում եմ․ «TRRIP-ի հայաստանյան տարածքով անցնող հատվածը, որը համարվում է Հայաստանի տարածք․․․ դրա մուտքն ու ելքը իրականացվելու է Ադրբեջանով»։ Ի՞նչ է նշանակում․ «Մուտքն ու ելքը իրականացվելու է Ադրբեջանով»։ TRRIP-ի իրականացման համար Հայաստանի գործող օրենսդրությո՞ւնն է արդյոք լիարժեք, ամբողջ ծավալով կիրառվելու, թե՞ նախատեսվում են օրենսդրական փոփոխություններ, որոնք կներառեն այն պայմանավորվածությունները, որոնց շուրջ դուք բանակցում եք Ադրբեջանի հետ»։
ԱԺ նախագահ Ռուբեն Ռուբինյանը ճշտեց, որ պատասխանելով հարցին՝ Բայրամովը նշել է, որ Ադրբեջանի հիմնական տարածքում դեպի Հայաստանի սահման կառուցվող ավտոճանապարհի աշխատանքներն ավարտված են մոտ 95 տոկոսով, իսկ երկաթուղու աշխատանքները՝ մոտ 75 տոկոսով։ Այնուհետև նա անդրադարձել է Հայաստանի տարածքով անցնող մոտ 42 կմ հատվածին՝ նշելով, որ այն TRIPP ծրագրի մաս է, իսկ դրա շուրջ բանակցություններն ընթանում են Հայաստանի և ԱՄՆ-ի միջև. «TRIPP-ի վերաբերյալ բանակցություններ են ընթանում Հայաստանի և ԱՄՆ-ի միջև, սակայն ամերիկացի գործընկերները մեզ պարբերաբար տեղեկացնում են աշխատանքների ընթացքի մասին։ Կրկնեմ՝ խոսքը Հայաստանի տարածքում գտնվող հաղորդակցությունների մասին է, սակայն դրա մուտքն ու ելքը Ադրբեջանի տարածքն է, Ադրբեջանի սահմանը և միայն այդ ձևով է այդ ճանապարհը՝ միջանցքը գործելու»։
Կարդացեք նաև
Նիկոլ Փաշինյանը անպատասխան թողեց այն հարցը, թե արդյոք փոխվելու է ՀՀ օրենսդրությունը՝ Ադրբեջանի հետ ձեռք բերված պայմանավորվածություններին հարմարվելու համար։
«Ես հարցս շատ ուղիղ տվեցի, դուք շրջանցեցիք այն։ Հայաստանի Հանրապետության գործող օրենսդրությունը տարածվելու է, գործելու է ամբողջ ծավալո՞վ, թե՞ իրականացվելու են փոփոխություններ՝ համապատասխան այն պայմանավորվածություններին, որոնք դուք բանակցում եք։ Ավելի ուղիղ տամ հարցս՝ ի՞նչ իրավական ռեժիմ է գործելու, ասեք հստակ, ասեք կոնկրետ, ասեք ուղիղ և մի լղոզեք ինքնիշխանության վերաբերյալ ընդհանրական ձևակերպումներով, որոնք տեղ են գտել համաձայնագրում։ Կոնկրետ ասեք՝ ով է որոշում կայացնելու մուտքի ու ելքի պահին»,- շարունակեց Մարիաննա Ղահրամանյանը։
Նիկոլ Փաշինյանը պատասխանեց. «Հայաստանի Հանրապետությունը․ կոնկրետ ասում եմ»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
