Ադրբեջանում հերթական հիստերիան է բարձրացվել. այս անգամ պատճառը Սանկտ Պետերբուրգի օդանավակայանի Duty Free-ում ղարաբաղյան օղու հայտնվելն է: haqqin.az ադրբեջանական լրատվական կայքի մոսկովյան մասնաճյուղը «անտարբեր չի մնացել» և շտապել է արձագանքել Սանկտ Պետերբուրգի «Պուլկովո» օդանավակայանի Duty Free-ում «Karabakh» անվանմամբ մրգային օղիների վաճառքին:
Կայքի հրապարակման համաձայն՝ Duty Free-ն իբրև թե վաճառում է «կեղծ» օղի, որն արտադրվել է «ոչ օրինական» տարածքում, «ոչ օրինական» կազմակերպության կողմից:
Միևնույն ժամանակ նույն հրապարակման մեջ գրված է, որ ապրանքատեսակի պիտակում որպես արտադրող նշված է Ստեփանակերտի կոնյակի գործարանի երևանյան մասնաճյուղը: Հետևաբար, որևէ խոչընդոտ չկա տվյալ ապրանքատեսակը միջազգային շուկայում սպառելու համար:
Այնուամենայնիվ, լրատվամիջոցը պարզաբանումներ է պահանջել ղարաբաղյան օղին ներմուծող «Լենրիանտ» ընկերության ղեկավար Գրեգորի Ծերեթելիից: Նշվում է, որ հարցումից հինգ օր է անցել, սակայն ադրբեջանական կողմն այդպես էլ պատասխան չի ստացել:
