«Հոդված 3» ակումբում Երևանի ավագանու ընտրություններին ընդառաջ ապրիլի 25-ին տեղի ունեցավ iDitord.org ինտերակտիվ հարթակի շնորհանդեսը: Այն ընտրությունների քաղաքացիական վերահսկողության բաց գործիք է, որը հնարավորություն կտա գրանցելու Երևան քաղաքի ավագանու ս․թ․ մայիսի 14-ին կայանալիք ընտրությունների քարոզարշավի ընթացքում հայտնաբերված խախտումները, այդ թվում՝ վարչական ռեսուրսի չարաշահումների մասին հաղորդումները։
Ընտրությունների քաղաքացիական վերահսկողության առցանց հարթակը պատրաստել է «Թրանսփարենսի Ինթերնեշնլ հակակոռուպցիոն կենտրոնը» (ԹԻՀԿ):
Ինչպես մամուլի ասուլիսին նշեց ԹԻՀԿ գործադիր տնօրեն Սոնա Այվազյանը, iDitord.org կայքը կգործի նաև Երևանի ավագանու ընտրությունների օրը և բաց կլինի բոլոր քաղաքացիների ահազանգերի գրանցման համար։
«Ինչպես գիտեք այս հարթակը Հայաստանում հիմնադրվել է դեռ 2012 թ-ի խորհրդարանական ընտրությունների ժամանակ: Այժմ մենք այն վերագործարկում ենք որպես Երեւանի ավագանու ընտրություններին քաղաքացիական վերահսկողության գործիք», – նշեց Այվազյանը:
Կարդացեք նաև
Ներկայացնելով հարթակը՝ ԹԻՀԿ ծրագրերի համակարգող Տաթևիկ Բարսեղյանը նշեց, որ կայքում տեղադրված է քարտեզ, որը թույլ է տալիս նշել, թե կոնկրետ որտեղ է կատարվել ընտրախախտումը: «Կայքը հնարավորություն է տալիս նաև ներբեռնել լուսանկարներ և տեսանյութեր», – ասաց նա:
Սոնա Այվազյանն էլ հավելեց, որ թեպետ կայքում տեղեկատվության ճշտման որոշակի հնարավորություն կա, սակայն այնուամենայնիվ նրանք չեն կարող հաստատ իմանալ` հավաստի է տեղեկատվությունը, թե ոչ:
«Մասնավորապես ընտրախախտումների մասին հաղորդող քաղաքացիները կայքում պետք է նշեն իրենց էլ.հասցեն եւ հեռախոսահամարը, որպեսզի անհրաժեշտության դեպքում մենք կապվենք նրանց հետ եւ որոշակի ճշգրտումներ կատարենք: Քաղաքացիների անձնական տվյալները՝ հեռախոսահամար եւ էլ.հասցե, կայքում չեն հայտնվելու», – ասաց Այվազյանը՝ հավելելով, որ բոլոր հաղորդագրությունները, որոնք տեղադրվում են կայքում նշում են որպես «ոչ հավաստի»:
«Սա հնարավորություն է տալու լրագրողների, ոստիկանությանը, դիտորդական կազմակերպություններին գնալ այդ խախտումների մասին հաղորդումների հետքերով եւ ստուգել դրանք», – պարզաբանեց նա:
«Հոդված 3» ակումբի համակարգող թիմ
