«Հայաստանի էլեկտրական ցանցեր» ընկերությունը տարին փակել է 9,7 տոկոս կորուստներով: Դրանք կհասնեն 9 տոկոսի, երբ ընկերությունը 200 միլիոն դոլարի ներդրում անի: Այսօր ՀԷՑ-ի գրասենյակում հրավիրված ասուլիսում այդ մասին ասաց ընկերության գլխավոր տնօրեն Կարեն Հարությունյանը: Նա ներկայացրեց ընկերության 2016 թվականի արդյունքները:
Հարցին, թե այս տարի Հայաստանի ատոմակայանը որոշակի ժամանակով կանգնելու է, արդյոք սա կազդի՞, որ էլեկտրաէներգիայի սակագինը բարձրանա, Կարեն Հարությունյանը պատասխանեց, որ սակագները ՀԷՑ-ի քննարկման կատեգորիան չեն. «Մեր մասով կարգավորումը գնում է սակագնային մարժայի, այսինքն` գնվածի եւ վաճառածի տարբերության մասով, իսկ ինչ կլինի վաճառքի, գնման սակագինը, դա սահմանում է Հանրային ծառայությունները կարգավորող հանձնաժողովը»:
Պարոն Հարությունյանը նաեւ ասաց, որ ատոմակայանի դադարի, վերանորոգումների ժամկետը ընտրված է այնպես, որ ամենաքիչ ազդեցությունն ունենա սակագնի ձեւավորման վրա: Ըստ նրա, հնարավորություն է ընձեռվել էլեկտրաէներգիա ներկրել Վրաստանից:
Aravot.am-ի հարցին, թե ատոմակայանի աշխատանքների դադարի դեպքում որքա՞ն էլեկտրաէներգիայի պահանջարկ է առաջանում, պարոն Հարությունյանն ասաց, որ ատոմակայանը բավարարում էր 25-30 տոկոս էլեկտրաէներգիայի արտադրությունը շուկայում:
ՀԷՑ-ի գլխավոր տնօրենից նաեւ հետաքրքրվեցին, թե հաշվի առնելով կորուստների նվազումը, սակագնի էական իջեցում կլինի՞: Ի պատասխան՝ պարոն Հարությունյանն ասաց, որ կորուստների ազդեցությունը սակագնի վրա կլինի 2020 թվականից հետո:
Ըստ Կարեն Հարությունյանի, 2016 թվականի ընթացքում Հանրային ծառայությունները կարգավորող հանձնաժողովը հաստատել է 201 միլիոն դոլար ընդհանուր արժողությամբ ընկերության ներդրումային ծրագիրը, որով կբարելավվի լարման որակը, անջատումների հաճախականությունը, բաշխիչ ցանցերը կընդլայնվեն, ՀԷՑ-ը տեխնիկապես կվերազինվի, հաշվարկման ավտոմատացված համակարգ կներդրվի:
Aravot.am-ի հարցին, թե ժամանակակից տեխնոլոգիաների ներդրմամբ ընկերությունում աշխատակիցների կրճատումներ սպասվո՞ւմ են, պարոն Հարությունյանն ասաց` այո: Նրա խոսքով, սակայն, կրճատված աշխատակիցները կամ այլ աշխատանքի կանցնեն, կամ մեկ տարի աշխատավարձը կշարունակեն ստանալ:
Մանրամասները` տեսանյութում
Լուսինե ԲՈՒԴԱՂՅԱՆ
