«Հանրապետական, ժողովրդավարական հասարակություններում, ինչպիսիք են ԱՄՆ-ն, մենք կարող ենք խոսել՝ որքան ժողովրդավարական է եղել ԱՄՆ-ն, քանի որ փաստարկները մատնանշում են, որ ԱՄՆ-ն նահանջում է ու դառնում է ոչ ժողովրդավարական եւ ավտորիտար երկիր»,- այսօր Խնկո ապոր անվան գրադարանում ասաց Ամերիկայի Միացյալ Նահանգների ամենահայտնի անկախ լրագրողներից մեկը համարվող Դավիթ Բարսամյանը:
Ըստ նրա. «Ունենք մի ռեժիմ Վաշինգտոնում, որը կառավարվում է մեկի կողմից, որը ամենաքիչ որակավորումն ունեցող ու վատագույն նախագահներից մեկն է ԱՄՆ պատմության մեջ, սա շատ վատ է ԱՄՆ-ի համար եւ շատ վատ է նաեւ աշխարհի համար, քանի որ ԱՄՆ-ն մեծ ազդեցություն ունի աշխարհի վրա, եւ այն փաստը, որ Թրամփի ձեռքում է ատոմային ռումբը, շատ վտանգավոր ժամանակաշրջան է ամենուր ու աշխարհի պատմության մեջ»:
Պարոն Բարսամյանի խոսքով, երբ բնակչությունը վախենում են, դատարկախոսները հեշտությամբ կարողանում են կառավարել նրանց. «Ինչը տեսնում ենք Թրամփի դեպքում, նա վախեցնում է ամերիկացի ժողովրդին՝ մեքսիկացիների, մուսուլմանների, գաղթականների հարցերով, որ նրանք լուռ մնան, քանի որ այդ դեպքում կարող է գալ ու ասել՝ ես ձեզ կպաշտպանեմ, պարզապես ինձ տվեք ձեր ձայնը»:
Ամերիկահայ լրագրողի դիտարկմամբ, Թրամփին պետք է նայել որպես աշխարհում ավտորիտար ուղղության մի մաս. «Նույնը տեսնում ենք Թուրքիայում Էրդողանի պարագայում, Հունգարիայում՝ Վիկտոր Ուրբանի պարագայում եւ այսպես շարունակ, սա միջազգային մի ուղղություն է դեպի ավտորիտար ռեժիմի կառավարության, եւ ԶԼՄ-ները հսկայական դեր ունեն այդ ամենը օրինականացնելու համար… Դուք կարող է մտածեք՝ Հնդկաստանը շատ ժողովրդավարական երկիր է, բայց արդեն վեց տարի է ինձ արգելել են այնտեղ մեկնել որպես լրագրող, որը գրում է Քաշմիրի մասին»:
Պարոն Բարսամյանը պատմեց, որ ամեն անգամ իր արտասահմանյան ուղեւորություններից վերադառնալուց հետո ԱՄՆ կառավարությունում իրեն երկար են պահում՝ հարցուփորձերով, թե ուր էր մեկնել, ինչի համար, ով էր գնել իր տոմսը:
Արփինե ՍԻՄՈՆՅԱՆ