Չեխիայի դեսպան Պյոտր Միկիսկան ԵՄ դեսպան Պյոտր Սվիտալսկու հայտարարությունը չի համարում միջամտություն Հայաստանի ներքին գործերին:
«Կարծում եմ, որ որոշ հայտարարություններ ու որոշ պաշտոնյաների մոտեցումներ չափազանցության արդյունք են: Հենց Հայաստանի կառավարությունն է միջազգային դոնոր կազմակերպություններից խնդրել աջակցել ընտրական գործընթացում տեխնիկական մասին… եթե դիտորդական առաքելությունը եկել է եզրահանգման, որ որոշ բաներ համատեղելի չեն ընտրությունների հետ, ես չեմ տեսնում պատճառ, որի համար Սվիտալսկին չէր կարող արտահայտել իր կարծիքը»,- այսօր Մամուլի ազգային ակումբում ասաց դեսպանը՝ նշելով, որ Չեխիան էլ է ընտրություններին աջակցել Հայաստանում դիտորդական առաքելությանը:
Անդրադառնալով հայ-չեխական քաղաքական հարաբերություններին՝ դեսպանն ասաց, որ երկկողմանի հարաբերությունները բարձր մակարդակի վրա են, հետո տեղեկացրեց, որ այս տարվա աշնանը Հայաստան կայցելի Չեխիայի խորհրդարանի խոսնակը. «Հաջորդ ամիս Պրահայում կընդունենք ԱԺ փոխնախագահ Էդուարդ Շարմազանովին, հուլիսին Չեխիա կայցելի նաեւ արդարադատության նախարար Դավիթ Հարությունյանը»:
Հիշեցնենք, որ Պյոտր Սվիտալսկին շաբաթներ առաջ քննադատել էր Հայաստանում անցկացված ընտրությունները, ինչը ՀՀԿ-ական պաշտոնյաների կողմից արժանացել էր սուր հակադարձումների:
Արփինե ՍԻՄՈՆՅԱՆ
