Վերակենդանացումը միջոցառումների ամբողջություն է, որի նպատակն է վերականգնել եւ պահպանել կենսագործունեության կարեւոր ֆունկցիաները՝ գիտակցությունը, արյան շրջանառությունը եւ շնչառությունը։ Վերակենդանացումը բաղկացած է իրար հաջորդող 3 միջոցառումներից.
1. Վերին շնչուղիների անցանելիության վերականգնում:
2. Թոքերի արհեստական օդափոխություն:
3. Արյան շրջանառության արհեստական պահպանում (սրտի արտաքին մերսում)։
Վերակենդանացման միջոցառումները կատարում են, երբ առկա է սրտի եւ շնչառության կանգ՝ կլինիկական մահ։
Կլինիկական մահը կարճատեւ՝ 3-5 րոպե տեւողությամբ, դարձելի սահմանային վիճակ է կյանքի եւ մահվան միջեւ, որը բնորոշվում է կենտրոնական նյարդային համակարգի ֆունկցիայի, արյան շրջանառության եւ շնչառության բացակայությամբ։ Կլինիկական մահվանը հաջորդում է կենսաբանական մահը։
Կլինիկական մահվան ախտանշաններն են՝
1. Գիտակցության բացակայություն։
2. Շնչառության բացակայություն։
3. Անոթազարկի բացակայություն ազդրային զարկերակներում։
4. Բիբերի լայնացում։
5. Հողագույն մաշկ։
Զանգահարեք շտապօգնություն կամ խնդրեք որեւէ մեկին զանգահարի։ Ստուգեք տուժածի շնչառության առկայությունը։
1.Պարզեք կրծքավանդակի շարժումների առկայությունը։
2. Լսեք նրա շնչառությունը։
3. Զգացեք շնչառությունը, ձեր այտը մոտեցրեք տուժածի քիթ-բերանին:
Ստուգեք արյան շրջանառության առկայությունը (ոչ ավելի, քան 10 վայրկյանում):
1. Շոշափեք անոթազարկը մակերեսային տեղակայված զարկերակների վրա (քնային, ճաճանչային, բազկային, ազդրային):
2. Անոթազարկի բացակայությունը քնային զարկերակի վրա՝ նշանակում է արյան շրջանառության բացակայություն («սրտի կանգ»)։
Առաջին օգնություն
Վերին շնչուղիների անցանելիության վերականգնում:
1. Տուժածին մեջքի վրա պառկեցրեք կոշտ-հարթ մակերեսի վրա։
2. Գլուխը ետ թեքեք, որի համար մի ձեռքը դրեք պարանոցի տակ, իսկ մյուսը՝ ճակատին, կամ երկու ձեռքի 4 մատներով (բացի մեծ մատը) բռնեք ստորին ծնոտի անկյուններից եւ ձգեք դեպի վեր եւ ետ:
Այս միջոցառումների արդյունքում լեզուն բարձրանում է վեր եւ ազատում է օդի ճանապարհը դեպի թոքերը:
Շարունակելի
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
26.07.2017
