Կլարկի համալսարանի պատմության պրոֆեսոր, ազգությամբ թուրք Թաներ Աքչամին «Աշխարհն առանց ցեղասպանության» կազմակերպության կողմից շնորհվել է «Ականավոր ճշմարտության ջատագով» (Outstanding Upstander Award) մրցանակ՝ արդարության և օրենքի գերակայության բնագավառում իր կատարած աշխատանքը համար:
«Աշխարհն առանց ցեղասպանության» կազմակերպությունը նպատակ ունի «պաշտպանել ամբողջ աշխարհում անմեղ մարդկանց, կանխել ռասիզմի և նախապաշարմունքների հողի վրա ցեղասպանությունը, հետամուտ լինել հանցագործների դատավարությանը և վառ պահել նրանց հիշատակը, ում կյանքն ու մշակույթը ոչնչացվել է բռնությամբ»:
Թաներ Աքչամն առաջին թուրք մտավորականներից է, որը բացահայտորեն խոսում է Հայոց ցեղասպանության մասին:
«Մենք մշտապես հիացել ենք Ձեր խիզախ և նվիրված աշխատանքով՝ փաստագրելու Օսմանյան կառավարության կողմից հայ ժողովրդի դեմ գործած վայրագությունները: Դուք չդադարեցիք բարձրաձայնել այդ ցեղասպանության մասին՝ չնայած թուրք ազգայնականների կողմից մահվան սպառնալիքներին»,- ասել է «Աշխարհն առանց ցեղասպանության» կազմակերպության գործադիր տնօրեն Էկեն Ջ. Քենեդին:
Պատրաստեց՝ Վիկտորյա ԱՆԴՐԵԱՍՅԱՆԸ
