ԱԺ «Ծառուկյան» խմբակցության պատգամավոր, Վերահսկիչ պալատի նախկին նախագահ Իշխան Զաքարյանի ընտանիքը, պարզվում է, դպրոցի տարածք է վարձակալել բավական վաղուց: Ենթադրվում է, որ մնացած հատվածի հարցերով զբաղվում է հիմա:
Երեւանի ավագանու «Ելք» խմբակցության անդամ Արայիկ Հարությունյանը «Ֆեյսբուք» սոցիալական ցանցի իր էջում գրել էր, որ «Երեւանի համար 41 դպրոցը, որը դատարկ էր մնացել օպտիմալացումից հետո, տրվում է Երեւանի քաղաքապետարանի հանրակրթության վարչության նախկին պետ Գայանե Սողոմոնյանին»:
Ավագանու անդամը նաեւ հավելել էր. «Գայանե Սողոմոնյանին, նույն ինքը՝ Երեւանի քաղաքապետարանի հանրակրթության վարչության նախկին պետը, նույն ինքը՝ ընդդիմադիր Իշխան Զաքարյանի կինը, էն նույն Զաքարյանները, ովքեր միլիոնանոց տուն էին սարքել, բայց՝ այլ երկրի քաղաքացիություն ունեցող մեծահարուստի փողերով։ Մանրամասները կներկայացնեմ քաղաքապետարան հարցմանս պատասխանները ստանալուց հետո։ 41 դպրոցը մի հիանալի տեղ է, հարմար, մեծ կայանատեղիով՝ «Պլանի գլուխ», Մարաշ տանող ճանապարհի խաչմերուկում»,- գրել է ավագանու անդամը:
Երեւանի Ա. Գրիբոյեդովի անվան N 41 դպրոցը մեկն է վերջերս օպտիմալացված հանրակրթական հաստատություններից: ՀՀ կառավարության օգոստոսի 24-ի որոշման համաձայն՝ կրթօջախը վերակազմակերպվել է ՝ միացվելով Երեւանի Խրիմյան Հայրիկի անվան N 10 հիմնական դպրոցին:
N41 դպրոցը գտնվում է Մյասնիկյան պողոտայի թիվ 2 հասցեում: Կառավարության որոշման նախագծում առկա տեղեկատվության համաձայն՝ շենքի ընդհանուր մակերեսը ավելի քան 1 500 քառ. մետր է, աշակերտների քանակը՝ 39, չնայած նախատեսված է 300 սովորողի համար:
Նշվում է նաեւ, որ հետ վերցվող դպրոցի շենքը թողնվում է ՀՀ կառավարությանն առընթեր պետական գույքի կառավարման վարչության տնօրինությանը:
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում:
