Aravot.am-ի հետ զրույցում փաստաբան՝ «Սասնա ծռերի» եւ «Սեֆիլյանի գործով» ամբաստանյալների շահերի պաշտպան Տիգրան Հայրապետյանն անդրադարձավ հարցին, թե ինչո՞ւ է ՀՀ փաստաբանների պալատի նախագահի ընտրություններում մեկ թեկնածու առաջադրվել՝ գործող նախագահ Արա Զոհրաբյանը:
Հիշեցնենք, որ այսօր պալատի նախագահի ընտրություններ են, արդյունքները հայտնի կլինեն վաղը: Տիգրան Հայրապետյանը նշյալ փաստը կապում է փետրվարին կայացած Փաստաբանների պալատի խորհրդի ընտրությունների հետ:
«Դրանք բավականին ակտիվ անցան, մրցակցություն կար 35-ից ավելի փաստաբանների միջեւ: Ընտրություններից հետո պարզ դարձավ, որ թեկնածուներից այն փաստաբանները, որոնք փորձառու են, դատարաններում կռիվ-պատերազմ տվող, եվրոպական դատարաններում գործեր շահող, չընտրվեցին, թեեւ ընտրությունները ազնիվ էին ու թափանցիկ: Կարծում եմ՝ դա այդ փաստաբանների վերջին տարիների վատ քարոզարշավի հետեւանք էր, որովհետեւ մյուս փաստաբաններն իրենց չէին ճանաչում»,-համոզմունք հայտնեց Տիգրան Հայրապետյանը:
Նա նկատեց՝ այդ փաստաբանները հաշվի չէին առել, որ վերջին տարիներին 1000-ից ավելի երիտասարդ փաստաբաններ են սկսել գործել, որոնք չէին ճանաչում իրենց. «Այստեղից իմ նշած փաստաբանները հասկացան, որ եթե առաջադրվեն պալատի նախագահի թեկնածու, չեն կարողանա ընտրվել: Եթե թեկնածություն դնեին, իրենց շուրջ կհավաքվեին: Չառաջադրվելը սխալ որոշում էր իրենց կողմից»:
Տիգրան Հայրապետյանի խոսքով՝ Փաստաբանների պալատում ոչ թե անառողջ մթնոլորտ է, այլ քննադատական. «Դա բնական է, որովհետեւ հիմա փաստաբանության վրա բոլորն են հարձակվում, որովհետեւ կարեւոր դատավարություններ են տեղի ունենում, ճնշումներ կան: Փաստաբանները պետք է քննադատեն այնքան, մինչեւ իրենց իրավունքները կպաշտպանվեն»:
Լուիզա ՍՈՒՔԻԱՍՅԱՆ