Քաղաքապետ Տարոն Մարգարյանը, հիմք ընդունելով Երևան քաղաքի ավագանու հոկտեմբերի 11-ի որոշումը, մայրաքաղաքի 2799-րդ տարեդարձի առթիվ հանդիսավոր պայմաններում, Երևանի պատվավոր քաղաքացու կոչում է շնորհել կինոռեժիսոր, ՀՀ ժողովրդական արտիստ Արտավազդ Փելեշյանին, Հայաստանի Հանրային հեռուստառադիոընկերության խորհրդի անդամ, ՀԽՍՀ ժողովրդական արտիստ Նարա Շլեպչյանին, բանաստեղծ, հասարակական գործիչ Ռազմիկ Դավոյանին և ՎիվաՍել–ՄՏՍ-ի գլխավոր տնօրեն Ռալֆ Յիրիկյանին:
Շնորհավորելով Երևանի նորահռչակ պատվավոր քաղաքացիներին և նրանց հանձնելով հավաստագրերը` քաղաքապետ Տարոն Մարգարյանը շնորհակալություն է հայտնել տարբեր բնագավառներում նրանց ներդրած նշանակալի ավանդի ու ակնառու վաստակի համար՝ նկատելով, որ սա ըստ էության յուրովի գնահատական է Հայաստանի Հանրապետության, նաև համայն հայության մայրաքաղաք Երևանի պատիվը միշտ բարձր պահելու նրանցից յուրաքանչյուրի ներդրած ջանքերի և նվիրվածության համար:
ՀԽՍՀ ժողովրդական արտիստ Երևանի պատվավոր քաղաքացի Նարա Շլեպչյանն էլ իր հերթին բոլորի անունից շնորհակալություն է հայտնել գնահատանքի համար՝ վստահեցնելով, որ այսուհետ ևս շարունակելու են նույն ոգով և նվիրվածությամբ աշխատել ու արարել հանուն Երևանի:
Երևանի քաղաքապետարանի տեղեկատվության և հասարակայնության հետ կապերի վարչություն
