Օլիմպիական խաղերի բրոնզե մեդալակիր, աշխարհի առաջնության եռակի մրցանակակիր, Եվրոպայի բազմակի չեմպիոն ու մեդալակիր, հունահռոմեական ըմբիշ, գերծանր քաշային Յուրի Պատրիկեեւի անունը երկար ժամանակ է, ինչ բացակայում է Հայաստանի ազգային հավաքականի ցուցակում: Այս տարիներին մարզասերները հստակ տեղեկություն չունեին՝ Պատրիկեեւը վերադառնալո՞ւ է մրցագորգ, թե վերջնականապես ավարտել է կարիերան:
Aravot.am-ը օրերս Հայաստանի ըմբշամարտի ֆեդերացիայի փոխնախագահ, հունահռոմեական ըմբշամարտի համակարգող եւ Հայաստանում Յուրի Պատրիկեեւի անձնական մարզիչ Սամվել Գեւորգյանի հետ զրույցում ճշտեց անվանի ըմբիշի ներկայիս մարզական կարգավիճակը: «Յուրի Պատրիկեեւն ավարտել է գործող մարզիկի կարիերան, բայց ըմբշամարտից չի հեռացել: Հիմա նա Կրասնոդարում մարզիչ է: Օրերս հեռախոսազրույց ենք ունեցել: Ասաց, որ ինքը ծանր քաշային աշակերտներ ունի եւ պատրաստակամ է հնարավոր ամեն ինչով օգնել մեզ հատկապես բարձր քաշային կարգերում, որտեղ մենք ավանդաբար մարզումային մրցակիցների պակաս ունենք մեր առաջատար ըմբիշների համար», – ասաց Սամվել Գեւորգյանը:
Աշոտ ՀԱԿՈԲՅԱՆ
