Դատավոր Նելլի Բաղդասարյանի նախագահությամբ այսօր քրեական աշխարհում «Նորատուսցի Ալիկ» անունով հայտնի Ալիկ Բանդուրյանի (լուսանկարում) և մյուսների գործով հերթական դատական նիստն էր:
Հիշեցնենք, որ 2016 թվականի նոյեմբերին «Լիա» գեղեցկության սրահում մահացած էին հայտնաբերվել Գևորգ Ավետիսյանը և Մուշեղ Մուշեղյանը: Նրանց սպանության համար մեղադրվում են Պետրոս Իսրայելյանը՝ հայտնի որպես «Չարբախցի Գեղամ», Ալիկ Բանդուրյանը եւ Արմեն Գասպարյանը՝ հայտնի «Բդո» մականվամբ:
Ըստ մեղադրանքի՝ «Լիա»-ի նկուղում Պետրոս Իսրայելյանը կազմակերպել է հանդիպում՝ ապահովելով նաեւ Մուշեղ Մուշեղյանի ներկայությունը, ապա Պետրոս Իսրայելյանը եւ Գևորգ Ավետիսյանը սուր կտրող-ծակող գործիքների, մահակների, բահերի կոթերի միջոցով հարվածել են Մուշեղ Մուշեղյանին, որն էլ ի պատասխան ատրճանակով կրակոցներ է արձակել. մահացել է Գևորգ Ավետիսյանը, ծանր վիրավորվել՝ Արամ Պետրոսյանը: Խնդիրը, ըստ քրեական գործի նյութերի, գումարային հարցերն են եղել:
Այսօր «Նորատուսցի Ալիկ»-ի շահերի պաշտպան, փաստաբան Երեմ Սարգսյանը ներկայացրեց նրա խափանման միջոց կալանքը փոխելու, ասել է թե՝ ազատ արձակելու միջնորդություն: Այս դատավարության ընթացքում նախկինում երեք անգամ նման միջնորդություն է ներկայացվել եւ մերժվել: Երեմ Սարգսյանն ընդգծեց՝ հիմնավոր չեն մեղադրանքի կողմի այն պնդումները, թե ազատության մեջ գտնվելով՝ «Նորատուսցի Ալիկ»-ը կխոչընդոտի գործի քննությանը:
Երեմ Սարգսյանը նշեց, որ կալանավորված լինելու ժամանակահատվածում Ալիկ Բանդուրյանի մոտ մի շարք հիվանդություններ են գլուխ բարձրացրել. «Դա վկայում է այն մասին, որ կալանքը պետք է անհապաղ վերացնել: Ութ ամիս առաջ նրա մոտ հայտնաբերվել է ողնաշարի խնդիր: Շտապ բուժում է հարկավոր, քանի որ դա ծանր հիվանդություն է»: Նշենք, որ Ալիկ Բանդուրյանին ոստիկանները դատարան են բերում անվասայլակով:
Ապա պաշտպանը պնդեց, որ նրա հիվանդությունները հնարավոր չէ բուժել բանտային պայմաններում: Բացի այդ, ըստ Երեմ Սարգսյանի, օրերս համապատասխան բժշկական արձանագրության մեջ նշվել է, որ նա հակատուբերկուլյոզային բուժման կարիք ունի, առավել եւս, որ եղանակի տաքացումը վատ է անդրադառնալու նրա վիճակի վրա: Միջնորդության քննությունն ընթացքի մեջ է:
Լուիզա ՍՈՒՔԻԱՍՅԱՆ
