«GALLUP International association»-ի հայաստանյան ներկայացուցչության տվյալները, թե Երեւանի ավագանու ընտրություններին կմասնակցեն ընտրողների 72,9 տոկոսը, չհամապատասխանեց ընտրությունների իրական մասնակիցների թվին: Ըստ պաշտոնական նախնական տվյալների՝ ընտրություններին մասնակցել են ընտրողների 43,65 տոկոսը:
«Պետք է նայել՝ արդյոք Երեւանի բնակչության վերաբերյալ ներկայացված պաշտոնական թվերը իրականությանը մոտ են: Մեր կարծիքով, դրանք 20-30 տոկոսով ուռճացված են, չեն համապատասխանում իրականությանը: Եթե դա էլ հաշվի առնենք, ապա մասնակցության առումով մեր շեղումը կարող է լինել 8-10 տոկոս»,- Երեւանի ավագանու ընտրությունների վերաբերյալ իրենց հետազոտության թվի ու պաշտոնական տվյալների տարբերությունն այսպես մեկնաբանեց «GALLUP International association»-ի հայաստանյան ներկայացուցչության տնօրեն Արամ Նավասարդյանը:
Հիշեցնենք, որ «GALLUP International association»-ի հայաստանյան ներկայացուցչության հետազոտությունը միայն ընտրությունների մասնակիցների թվի մասով էր անհամապատասխան պաշտոնական նախնական տվյալներին:
Արփինե ՍԻՄՈՆՅԱՆ
